Isikhundla sikamsekeli kamongameli welizwe esilokhu sikhamisile ngemva komnyaka owodwa lengxenye sibikwa sesidale ukudonselana kwamacele aku Zanu PF lanxa kwavunyelwana ukuba omunye wabasekeli avele kulabo ababekubandla le PF Zapu.
Loku kuvumelana okwenziwa nguMongameli Mugabe kuze kusivumelwano se Unity Accord ngomnyaka ka1987 akulotshwanga phansi osekubangele ukuthi lalabo ababengekho ku PF Zapu bathi labo bayasifuna.
Omunye othiwa uyasifuna nguMnu. Emmerson Mnangagwa, umphathintambo wezemithetho.
Iphephandaba le The Herald lithi umgcinisihlalo webandla le Zanu PF uMnu. Simon Khaya Moyo, onguye ocatshangelwa ukuthi engathatha lesi sikhundla, izolo uthe isivumelwano esenziwa nguMugabe lo Nkomo lokhu sisebenza okokuthi akula muntu ongasidiliza.
Amalunga eZanu PF kunye lozulu mahlayana uyathandabuza ukuba kanti kungani uMugabe engakhethi umsekeli wakhe, nanku isikhathi sesiside kwabhubha owayengumskeli wakhe, uMnu. John Landa Nkomo.
Kodwa owalwa impi yenkululeko ephansi kwevuyo le Zipra, uMnuMax Mkandla utshele iStudio Seven ukuba ulethemba lokuba uKhaya Moyo uzakhethwa ukuba ngumsekeli kamongameli emhlanganweni omkhulu webandla leZanu PF, oweCongress.