Ugatsha lweSadc Troika soluxwayise uMongameli Mugabe ukuthi engaze aqhubeka ngomcabango wokwenza ukhetho lonyaka kungakalotshwa isisekelo sombuso esitsha njalo kwalungisiswa konke okuhluphayo kusivumelwano seGlobal Political Agreement.
ITroika yenze umhlangano eLuanda, Angola ngoLwesihlanu loMongameli Mugabe, inhloko kahulumende uMnu Morgan Tsvangirai loMnu Welshman Ncube bekhulumisana ngodaba lweZimbabwe.
UMongameli weleSouth Africa uMnu Jacob Zuma, ongumgcinisihlalo weSadc Troika wethule ugwalo emhlanganweni lo ngodaba lweZimbabwe oluveza ukuthi kusakunengi okusamele kwenziwe andubana kuyiwe kukhetho.
Amanye amalunga eTroika athi eleZambia leleTanzania lawo aphathekile kulumhlangano. UMongameli weAngola uMnu Eduardo Dosantos laye ubekhona lanxa engayisilo lunga leTroika.
UTsvangirai, uNcube loMnu Arthur Mutambara babikwa bevumelane loZuma ekuthini kumele kulungisiswe konke okuhluphayo kungkayiwa kukhetho.
Ingcwethi kwezombusazwe uMnu Effie Dlela Ncube utshayele iSadc Troika ihlombe ngokuthatha lelinyathelo.
