Inhlanganiso ezizimeleyo zithi kumele amazwe wonke angenele kweleMozambique osokubulewe abantu abanengi kulandela ukwethulwa kwempumela yokhetho.
Kugwalo ezilwethule ngoLwesihlanu phansi komanyano weCivil Society Coalitions and Networks, inhlanganiso lezi zithi sibi kakhulu isimo sezombusazwe kulelolizwe osokubulewe abantu abedlula ikhulu lamatshumi amathathu – 131 ngabezomvikela.
Bathi kumele umanyano weSouthern African Development Community kanye leAfrican Union bengenele kudaba lolu.
Kulabantu abedlula inkulungwane eziyisithupha – 6,300 okubikwa ukuba sebeyiziphepheli kweleMalawi kulandela udlakela oluqhamuke kweleMozambique, okulabaphikisayo abatshengisela emigwaqweni besithi uMnu. Daniel Chapo, owayemele ibandla leFrelimo kukhetho lukamongameli, wakhethwa okungekho emthethweni.
Kusenzakala konke lokhu, abatshayeli bezimota ezinkulu bathi kulez’insuku kuthule kancane emigwaqweni ngakho-ke bangena kuhle eMozambique besuka kweleSouth Africa.
Sixoxe ngalokhu lokunye lomunye wabo uMnu. Forget Mpofu obelubhekise emaputo ngoLwesihlanu.
Forum