Inhlanganiso ezilwela ilungelo loluntu zikhuthaza inkokheli yamazwe angezansi kwezwekazi leAfrica ukuba yamukele ngokuphangisa iziqondiso zesivumelwano sokuvumela ukuhamba kalula kukazulu kulumhlubulo kungela nkinga, eze Protocol on The Facilitation of Movement of People in Southern Africa.
Inhlanganiso ezehlukeneyo zamazwe asesigabeni sangezansi kwezwekazi le Africa, ezikumanyano we National Association of Non - Governmental Organisations, ziveze lokhu emhlanganweni owenzelwe eweteleni ye Rainbow Towers e Harare lamuhla ekuseni.
Lezinhlanganiso zithi kumele inkokheli zeSADC ziveze inkinga esibangele ukungazinikeli kwazo ukuloba amagama kulesi sivumelwano lokulandela okwavunyelanwa ngomnyaka ka 2005.
Umgcinisihlalo weNANGO kulumhlubulo, umnumzana Rangarirai Machemedze utshele intathelizindaba ukuba kumele zizinikele lezinkokheli ukwamukela lezi ziqondiso ukuze kube lula ukusebenzelana phakathi kwala mazwe ngoba kusetshenziswa indlela yinye.
Usola isimo esisesigabeni, lapho ilizwe linye ngalinye lisenza elikufunayo, kungela okuwafuqa ukuthi enze into yinye lanxa kuhlezi kuvunyelanwa sikhathi sonke ukuba abantu bakulesi sigaba bengabantu banye, kungamelanga bahlukuluzane.
Umnumzana Polite Ndlovu ngumgcinisihlalo we NANGO esigabeni seMandebeleni esigoqela idolobho lakoBulawayo, Matebeleland North le Matebeleland South. UNdlovu uthi ukusebenza kwalezi ziqondiso kuqakathekile ngoba kuzakwenza ukuba uzulu ahambe lula kungela kuhlukuluzwa njengalokho okuyikho okwamanje.
UNdlovu uthi zinengi izizatho ezenza amazwe aweSADC adonse inyawo, engajahi ukuloba li protocol eqakatheke kangaka empilweni kazulu ikakhulu oweZimbabwe osephila ngokuthengisa impahla ayithenga kwamanye amazwe asesigabeni lesi.
Wengeza uNdlovu echaza injongo yaloluhlelo lokufuqa inkokheli yalamazwe ukuzinikela oluphansi kwesihloko esithi “THE SADC WE WANT CAMPAIGN".
Okusekelwe ngumnumzana Maxim Murungweni osebenza ekuhlangothi olubona ngezokuqhutshwa kwenhlelo enhlanganisweni ye Zimbabwe National Council for the Welfare of Children-ZNCWC.
UMurungweni, uthi uhulumende weZimbabwe angachasiselwa kabanzi, ulakho ukuloba igama kuli protocol ngoba esezwisisa ukuqakatheka kwayo kuzizalwane zelizweni.
Kubikwa eyisitshiyagalo lunye kuphela amazwe, okubalisa eleZimbabwe, asethe aloba igama kuli protocol.
Amane kuphela yiwo asenza kwaba ngumthetho osetshenziswayo, eleZimbabwe kusamele likwenze lokho . Kudinga isilinganiso sokubili kokuthathu ukuze yamukeleke esigabeni li protocol, avunyelwe uzulu ukuhamba kungela kuhlukuluzwa.
Lokhu kusitsho ukuba kudinga amazwe alitshumi ukuba enze lokho, kodwa ngoba emalutshwana aseyamukele , kungeke kwafezeka lokho.