Umanyano weSouthern African Development Community (SADC) uncoma ukhetho olusanda kuqhutshwa kweleMozambique kulabantu abaphikisayo abatshengisela kulelolizwe besola impumela yokhetho okunqobe ibandla leFrelimo.
Umanyano lo oqhube umhlangano weExtraordinary meeting eHarare ngoLwesithathu wethule umbiko ongavezanga ukuba luzaphathwa njani udaba lwakweleMozambique.
Kumbiko lo, iSADC income ukhetho oluqhutshwe kulelolizwe isithi ukhetho lolu belukhululekile njengalokhu okwenziwe kweleMauritius lakweleBotswana.
Iphinde yenzela amhlophe umongameli omutsha wakweleBotswana uMnu. Duma Gideon loMnu. Navin Ramgoolam wakweleMauritius.
Inkokheli le ithe kumele kulungiswe udaba lwempi yomvikela kweleDemocratic Republic of Congo.
Bathi kuyabakhathaza okwenzakala kulelolizwe okulabantu abakhahlanyezwa yimpi le.
Inkokheli yeSADC ithi kumele iqula layo eleSADC Mission in the Democratic Republic of Congo liqhubekele phambili lisebenza kulelolizwe ukuze kumiswe impi yomvukela.
Akade besemhlanganweni lo bagoqela uMongameli Emmerson Mnangagwa, uMongameli Duma Gideon Boko (Botswana), uMongameli Felix Antoine Tshisekedi Tshilombo (DRC) loMongameli Andry Rajoelina (Madagascar).
Kulabakhokheli babohulumende abalitshumi lanye, abagoqela uMongameli Cyril Ramaphosa, abangahambanga emhlanganweni lo eHarare. Akwaziwa ukuba kwenziwe yini ukuthi bengahambi emhlanganweni lo. Bebemelwe ngabasekeli babo kumbe abaphathintambo ababona ngokudlelana lamanye amazwe.
Forum