Inhlanganiso zamabhizimusi eZimbabwe ezigoqela iZimbabwe National Chamber of Commerce leConfederation of Zimbabwe Industries zithi zikhathazekile ngesinqumo sebhanga elikhulu lelizwe eleReserve Bank of Zimbabwe kumbe R.B.Z esokuphuza ukuthola izigidi lezigidi zamadola abhadalwa ngamabhizimusi atshiyeneyo.
Imali le yabhadalwa ngamabhizimusi ayefuna ukuthenga imali yakwamanye amazwe. IRBZ ithi ayilamali eneleyo yokubhadala osomabhizimusi laba ngakho iyenelisa ukubhadala izigidi zamadola lezi phakathi kweminyaka emibili.
Osomabhizimusi bona bathi lokhu kuza kwehlisa izinga lokusebenza kwabo njalo sebesengozini yokubotshiswa ngamabhanga abawakweleda imali.
Osomabhizimusi laba baqhube umhlangano losibalukhulu webhanga leRBZ, uMnu. John Mushayavanhu, oveze ukuba akenelisi ukubabhadala imali yabo. Kusenjalo, isisindo semali entsha iZimbabwe Gold kumbe ZiG sesiqale ukwehla kungela malanga limali iqale ukusebenza.
NgoMvulo i13, 45 ZiG ibithenga idola leMelika elilodwa kodwa namuhla abanengi bathi sebedinga imali ephakathi kwe15 le 20 ZiG ukuthenga idola leMelika elilodwa.
Umkhokheli wenhlanganiso yeZimbabwe National Chamber of Commerce uMnu. Mike Kamungeremu uthe baqhube umhlangano losibalukhulu weRBZ, bamtshela ukuthi abanye osomabhizimusi babhadalwa imali ngabathengi basebethatha limali bayisa eRBZ ukuze bathenge idola leMelika elokuthenga impahla ngaphandle kwelizwe ngakho sebeseduze lokubotshiswa ngabathengi.
Ingcwethi yezenotho esebenza lenhlanganiso yeDisability Centre, uMnu. Masimba Kuchera yena utshele iStudio7 ukuthi ibhanga leR.B.Z laphazamisa njalo lokhu kulakho ukubangela ukuthi amabhizimusi angalethembi.
Kodwa ocebisa ibhanga leRBZ uMnu Persistence Gwanyanya utshele iStudio7 ukuthi imali entsha isekelwa ligolide ngakho ayisoze iphele amandla njengezinye.
Forum