EleIran lithi lizancedisa eleZimbabwe ukuqinisa ugatsha lwalo lwezomvikela ukuze lenenise ukuzivikela nxa lithe lahlaselwa ngamanye amazwe, ikakhulu angentshonalanga.
Amazwi la ethulwe ngumphathintambo obona ngezomvikela kweleIran uBrigadier General Ahmad Vahidi ngeSonto kulandela umhlangano awenze lomunye weleZimbabwe uMnu Emmerson Mnangagwa.
UMnangagwa owekwethekelele kweleIran utshele intathelizindaba ngoMgqibelo ukuthi injongo yohambo lwakhe ngeyokuqinisa ubudlelwano kwezomvikela phakathi kweleIran leZimbabwe.
Ubudlelano phakathi kwamazwe womabili bukhanya bundlondlobala ngoba eleIran selisungule inhlelo ezithile eHarare kuminyaka esanda kwedlula, ezigoqela inkampani elungisa indizamtshina zohlobo lwamaHelicopter.
UMongameli weleIran uMnu Mahmoud Ahmadinejad laye uke wethekelela eHarare ngomnyaka ka2010 lapho ahlangane khona loMongameli Mugabe.
EleIran lilizwe elithwele gadalala ngezijeziso elizetheswe ngamazwe angentshonalanda phezu kohlelo lwalo lweNuclear, olubikwa lujonge ukulungisa amabhomba embubhiso, amaNuclear bombs.
Umphathintambo obona ngohlelo lokuxolelana elizweni uMnu Moses Mzila Ndlovu yena ongomunye wabalwa impi yenkululeko uthi imbiko yeIran le iyamangalisa ngoba eleZimbabwe lingekho engozini yokuhlaselwa yiloba yiliphi ilizwe.
Ukuhlaziya loludaba uNtungamili Nkomo owe Studio 7 uxhume ingcwethi ecubungula ezombusazwe uMnu Nkululeko Sibanda, oveze imbono efana lekaMzila.
