Elinye ilunga lequla likaMongameli Jacob Zuma weleSouth Africa lithi kuyabamangalisa ukuthi abeZanu PF labeMDC ekhokhelwa nguMnu Morgan Tsvangirai bathi kabemukeli umhlahlandlela wokhetho khona kuyibo abawuhlelayo.
Abamela amabandla akuhulumende womanyano baqede lumhlahlandlela kumaviki edluleyo, kodwa ibandla leZanu PF lale ukuwamukela lisithi lifuna uhlelwe kakutsha ukuze ukhetho lwenziwe lonyaka.
Ngakwelinye icele, abeMDC kaTsvangirai labo bathi bafuna umhahlandlela lo ukubeke sobala ukubana uhlangothi olubona ngezokhetho olweZimbabwe Election Commission (ZEC) kumele lukhethwe kakutsha njalo kuguqulwe indlela ababona ngezomvikela abasebenza ngayo.
Amabandla la kavumelani phezu komhlahlandlela lo lanxa ewunikeze iqula likaZuma kumaviki ambalwa edluleyo esithi sevumelene kukho konke okumunyethwe kuwo.
Ukudonselana lokhu kuza ngesikhathi kulungiselelwa umhlangano weSadc omkhulu ozakwenzelwa eAngola mhlaka 16 kuyonale inyanga lapho uZuma akhangelelwe ukwazisa abakhokheli beSadc ngokuthi sikuliphi ibanga imizamo yakhe yokulungisisa udaba lweZimbabwe.
Okuqula likaZuma uNkosazana Lindiwe Zulu utshele uNtungamili Nkomo weStudio 7 ukuthi kuyabamangalisa ukubana abeZanu PF labeMDC bazathi kabawamukeli njani lumhlahlandlela kuyibo abawulobayo.
