Abadlali bomdlalo wenguqu abaduma bedlalela iqembu le Highlanders bona abazibiza ngokuthi yi Highlanders Legends bake bavakatshela elizweni le Botswana ensukwini ezedluleyo besiyancedisa iqembu lakhonale ele Notwane ukuthakazelela ukufikisa iminyaka engamatshumi amahlanu.
Abadlali laba asebathatha umhlala phansi babizwe ngomunye wabo oyisiphathamandla seqembu le Notwane uLawrence Phiri laye owaduma edlalela iqembu le Highlanders waphinda njalo waba yi meneja yaleliqembu ngesikhathi eseyekele ukudlala.
Ilunga leqembu le Highlanders Legends uMarko Dube uthi iqembu le Notwane livele lilobudlelwano obuhle leqembu le Highlanders ngoba kungasuye yedwa uPhiri osuke kuqembu le Highlanders esiyalisebenzela.
Iqembu le Highlanders Legends yilo elinqobe kumidlalo yamakhehla ngemva kokunqoba ele Notwane nge 4 ka 2 kusigaba se semi final kwathi kumdlalo we final linqobe ele Swift XI nge 4 ka 3 ngemva kokutshaywa kwembekwa.
Umfoka Dube uthi abeqembu le Notwane bathe bazaphanga labo belandele beze kwele Zimbabwe ukuzodlala imidlalo ethize edolobheni lako Bulawayo njengendlela eyokuqinisa ubudlelwano obukhona phakathi kwenhlanganiso zombili.
Abadlalela iqembu le Highlanders abakade beyingxenye yeqembu elidlale kwele Botswana ngabagoqela uSimon Sibanda, uSam Sibanda, uBlessing Gumiso, uMaster Masiku, uTobias Mudyambanje, uBarry Daka - obenguye umqeqetshi waleliqembu, uGift Lunga Senior, uColsen Mabeza, uThemba Ncube kanye laye uMarko Dube.
Umdlali owaduma edlalela iqembu le Ziscosteel owake waba njalo ngumqeqetshi weqembu labesifazane elimela ilizwe ele Mighty Warriors u Benedict Moyo laye uhambe ndawonye leqembu le Highlanders Legends ikanti kulabadlali abayizizalwane zelizwe le Zimbabwe abahlala elizweni lase Botswana abafana lo Themba Lunga, laye owadlalela iqembu le Highlanders, kanye lowadlalela iqembu le Zimbabwe Saints uChemi Hunidzarira labo abadlalela iqembu le Bosso Legends.
UDube ukhuthaze abanye abadlalela iqembu le Highlanders asebathatha umhlala phansi ukuba bephatheke kunhlelo zabo.
Ezinye izizalwane zase Zimbabwe eziphatheke kumkhosi wokuthakazelela ukufikisa kweqembu le Notwane ngezigoqela umqeqetshi uPaul Moyo kanye lomdlali uFabian Zulu bona abesebenzele leliqembu okweminyaka eminengi.
Iqembu le Highlanders Legends belihlanganisela labasekeli beqembu uNorman Moyo kanye lo Thokozani Dube.