Umthethwandaba kaMantshi eHarare, wehluleke ukuthonisisa ngoLwesine, intathelizindaba ezimeleyo, uFrank Chikowore loSamuel Takawira wenkampani yomasakazo we263 Chat, abetheswa icala lokwala ukulalela iziqondiso zamapholisa ngokungena esibhedlela obekulaliswe amalunga amathathu awe MDC Alliance abagoqela uNkosazana Joana Mamombe. Lokhu kubangelwe yikuba abatshutshisi betshele uMantshi ukuthi sebeguqula icala eletheswa ababili laba.
UChikowore loTakawira bamangele lapho befika emthethwandaba ngoLwesine, betshelwa ukuba icala abaletheswayo seliguqukile.
Abatshutshisi bathi icala elitsha ngelokwephula iziqondiso zokuvimba ukuthelelanwa kwegikwane leCovid-19 ngokungasondelani kwabantu duzane laduzane i-Social Distancing.
Ababili laba babotshwe mhlaka 22 Nkwenkwezi esibhedlela seParktown esisemzini weWaterfalls eHarare, besetheswa icala lokungena kulesi sibhedlela ngaphandle kwemvumo.
Amagqwetha ababili laba bathi labo bamangaliswe ngabatshutshisi asebeguqula icala. Bathi leli nyathelo selithathwa ngoba elakuqala belingasoze laya ndawo emthethwandaba belizahle lilahlwe.
Icala leli elitsha lizaqhubeka lihlaziywa ngeviki ezayo lapho idale elikhangelelwe ukuphuma lesinqumo.
UChikowore loTakawira bayawalandula wonke amacala abewetheswayo.
Ekuqaliseni kwayonale iviki kulenye njalo intathelizindaba esebenza izimele eyeMasvingo, uGodfrey Mutimba, obotshwe esetheswa icala lokungahloniphi umongameli welizwe laye osamelele ukuthonisiswa. U Mutimba ubotshwe eqhuba umsebenzi wakhe waveza lengwalo zake zomsebenzi kodwa wabotshwa kunjalo.
EBeitbridge eyinye njalo inatheliindaba yephephandaba leNewsday, uRex Mphisa, Kanye lothengisa amaphephandaba aweZimpapers, uCharles Marerwa babotshiwe labo besetheswa icala lokwephula umthetho ophathelane lokuvimba ukumemetheka kweCovid 19 lanxa ugatsha lwezokwethulwa kwemibiko lwazisa ukuba intathelizindaba ziyizisebenzi eziqakathekileyo zesigabeni seEssential Service, ngakhoke ziyavunyelwa ukusebenza ngesikhathi seLockdown.
EChinhoyi, eyinye njalo intathelizindaba esebenza izimele uNunurayi Jena umelele ukuthosiswa ngecala elifanayo. Ngeviki edluleyo umsakazi weCapitalk, uNyaradzo Makombe-Hazangwi umiswe ukuya emsebenzini okwamaviki amabili engaholiswa ebikwa wasakaza uhlelo oluphathelane lokuhlukunyezwa lokwephulwa kwamalungelo oluntu olwalungahlelwanga kuhle.
Umqondisi wenhlanganiso esebenzisana lozulu eyeZimbabwe Peace Project okungelinye lamalunga omanyano wenhlanganiso ezingaphansi kwe Human Rights NGO Forum, uNkosazana Jestina Mukoko yena usola ukuphathwa kubi okwenziwa intathelizindaba elizweni.
“Kulusizi kakhulu ukuthi sibona ukuncindezelwa kwentathelizindaba ikakhulu kuleli liviki, singene kuleliviki sibona intathelizindaba zabesifazane ezimiswe lokuxotshwa umsebenzi ngenxa yenhlelo abazenzileyo. Sidane kakhulu ngokuthi sibe kwazi ukuthi kelezinto ezinje ezilokhe zisenzakala elizweni elakithi e Zimbabwe. Lifanele ukuthi kube lilizwe eliphumeleleyo, ilizwe elihambelana lalokho okukusisekelo sombuso okuphathalane lokuthi abantu bathole imibiko bekhululekile.”
Asenelisanga ukuthola icele likahulumende kulokhu njengoba umabhalane omkhulu kugatsha lwezokwetulwa kwemibiko uMnu. Nick Mangwana ubengadobhi dobhi ucingo lwakhe lukamakhalekhukhwini.