Intathelizindaba zeZimbabwe sezimanyane lenhlanganiso eqoqa igazi, iNational Blood Services emizameni yokukhuthaza uzulu ukuthi azinikele ekupheni igazi ukuze kuhlengwe abayabe belifuna nxa bethe bewelwe yingozi.
Inhlanganiso zentathelizindaba ezigoqela oZimbabwe Union of Journalists (ZUJ) leMisa zithethe lelinyathelo ngemva kokulahlekelwa ngeinyeyazo intathelizindaba ebidume kakhulu, isebenzela umsakazo weZBC, uFreedom Moyo ngeviki edluleyo.
UMoyo ufele eHarare ngemva kokulimala kakubi engozini yemota, lapho ophe walahlekelwa ligazi elinengi, kwathi lalapho odokothela sebezama ukumhlenga kwatholakala ukuba igazi belisilela esibhedlela abekuso.
Ukuphuza okwenzakeleyo ukuba aphiwe igazi emzimbeni kubikwa kungokunye okubangele ukuba uMoyo elahlekelwe yimpilo.
Ngalokho abeNational Blood Services lentathelizindaba bathi bakubone kufanele ukubana basungule umkhankaso wokukhuthaza uzulu ukuthi anikeze igazi ukuze iziphala zegazi zihlale zigcwele.
Umkhankaso lo uzaqala ngoMgqibelo eHarare lakoBulawayo ngehola letshumi ekuseni lapho izimota zeNational Blood Services ezizathwala uzulu khona zimhambisa ezibhedlela ukuyakupha igazi.
KoBulawayo umkhankaso lo uzaqhutshelwa eUnited Bulawayo Hospitals kuthi edolobheni leHarare ubeduzane lesibhedlela seParirenyatwa.
Umkhokheli weNational Blood Services ezabelweni zeMatabeleland uMnu Mfundo Ngwenya uthi ukupha ugazi yikuzimbela.
