Inkosi uBulelani Lobhengula Khumalo yesizwe sikaMthwakazi uthi uMongameli Emmerson Mnangagwa uyazikhulumelanje nxa ethi akasoze avumele ukuvuselelwa kobukhosi besizwe samaNdebele ngoba vele yena sowakhethwa njengenkosi njalo lokhu akusoke kuguqule lutho.
Inkosi uBulelani Lobhengula Khumalo uthi amazwi kaMnangagwa awabahluphi njalo kawalani lesiko lesizwe sikaMthwakazi.
Isikhulumeli senkosi, uMnu. Bornman Khumalo, uthi akekho umuntu olelungelo lokutshela isizwe ukuthi siqhube njani amasiko aso.
“Inkosi yeMaNdebeleni isikhona. Inkosi yeMandebeleni NguBulelani Lobhengula kaMzilikazi. Asazike ukuthi umongameli yena ubekhulumela kukuphi. Uthi yena kazu kuyipha imvumo. Eyani ngoba phela ubukhosi lisiko lethu aMaNdebele. Isiko lethu asiliceli kuhulumende. Isiko lethu liyithi. Isiko lethu siyaliphila.“
Ngesikhathi ekhuluma ngempelaviki emhlanganweni wekomiti yebandla leZanu PF ebona ngokuqhutshwa kwenhlelo zaleli bandla esabelweni seMidlands, uMnangagwa uthe kulabathile ababefuna ukuvuselela umbuso womdabu wamaNdebele kodwa bayincitshwa leyo mvumo. Uthi ngeke avumele kube lenkosi phakathi kweZimbabwe ebuswa nguhulumende okhethwe ngabantu.
Kodwa-ke uKhumalo uthi okufanele uMnangagwa akwazi yikuthi mhlaka 3 Mbimbitho 2018, isizwe sikaMthwakazi sasihlele ukugcoba inkosi uBulelani Lobhengula Khumalo ngokusemthethweni ngokwesiko laMantungwa.
Umthethwandaba lohulumende bawenqabela lowo mkhosi ngesizatho sokuthi lokhu akukho emthethweni. Ngomnyaka olandelayo ingwevu zaMantungwa zaqoqana zayigcoba inkosi ngokwesiko lamaKhumalo base beyethula emphakathini ngokusemthethweni, njengokutsho kwesiko labo. Lokhuke uthi ngumgogodla wesiko laMaNdebele elingeke liguqulwe nguhulumende, umongameli loba umthethwandaba.
Impendulo yenkosi uBulelani isisekelwe linengi labantu lenhlanganiso ezidabuka eMandebeleni. Isikhulumeli sebandla leMthwakazi Republic Party (MRP), uMnu. Velile Moyo, uthi kuyabethusa ukubona umongameli esiba lesibindi sokuma emphakathini ezitshaya isifuba ngokuthi ulamandla okucindezela isiko lesizwe njalo okulilungelo elikusisekelo sombuso welizwe.
“Angaqhubeka uMnangagwa aqhubeke ekhuluma atsho lokho angakutsho kodwake uma isikhathi serevolution sesifikile akukho umuntu ongenelisa ukuthi asibuyisele emuva. Sithi thinake hayi abantu bakithi ma bangakhathazwa yilokhu okukhulunywa nguMnangagwa. Amakhosi wonke akithi sizawavuselela ngenkani kungabe iyathanda iZimbabwe loba kayithandi. Uma kuyikuthi bafuna ukuthi bacrashe isizwe seMatabeleland siphele njengalokhu ababefuna ukukwenza ngombuqazwe, asizukukuvumela.”
Isizalwane seZimbabwe, uMnu. Mlungisi Tshabalala, uthi uMnangagwa uveza ukuba lolwazi oluncane uma ekhuluma ngamasiko lezomdabu.
“ISouth Africa is a republic. Ilenkosi zemihlobo yonke ekhona eSouth Africa. Nansiyana inkosi yamaZulu uZwelithini. Nansiyana inkosi yaMaxhosa lapha oSigcawu bakhona, wonke amaBhaca bakhona, eMaTshanganeni akhona. EMavendeni akhona. Bonke bayahlonitshwa ngendlela yakhona. Kanti izinduna lezi okuthiwa ziyavunyelwa eZimbabwe zivunyelwa ziripota kubani? Lokho mpela yikudelelwa.”
Kusinqumo esethulwa ngumthethwandaba weHigh Court ngodaba lokugcotshwa kwenkosi uBulelani ngoMbimbitho ngo 2018, umahluli uJustice Martin Makonese wathi ukwenza lokhu akukho emthethweni ngoba kungela mthetho eZimbabwe osekela ukugcotshwa kwenkosi. Kusinqumo esifanayo njalo wakhuthaza iqula labafuna ukwenza lokhu ukuthi kungenzeka kuphela nxa bengakhuthaza uhulumende ukuthi ethule imithetho evumela ukubekwa kwenkosi zomdabu.
