Izakhamizi zeMatobo zithi izifuyo ezinengi sezisifa ngenxa yokuswelakala kwamanzi lamadlelo.
Izakhamizi ezikhulume lomsakazo weStudio 7 zithi inkomo ezinengi zibanjelwa emadamu zidinga amanzi kuthi njalo ezinye zifa ngenxa yokuswelakala kwamadlelo.
UMnu. Mathew Sibanda ngomunye wabalimi ababhekane lodubo lolu.
"Sibhekane lobunzima obukhulu, izifuyo sezicuba emakhaya kuthi lokudla kwenkomo lakho akusathengeki sekuqansa impikalamalanga ibhele lotshani liqale libiza madola amabili kodwa manje selibiza amadola amathathu lengxenye kusiya kumadola amane."
UNkosikazi Sithembile Dube ohlala eMabonyane eKezi ukusimo esifanayo.
"Inkomo sezicuba njalo azilamadlelo ngoba vele izulu alinanga kahle sibhekane lobunzima obukhulu."
Banengi abantu ababecabanga ukuba uhulumende uzabathengela ukudla kwenkomo. Okwamanje abakatholi lutho eKezi. Induna uMayengeni Fuyane uthi sibi kakhulu isimo sezifuyo esigabeni sakhe.
"Uhulumende watthembisa ukuthi uzatholisa abantu ukudla lezifuyo kodwa asikkakuboni. Kusisyafika uLwezi loMpalakazi inkomo ezinengi ziyabe seziphelile ngokucubiswa yindlala lokuswela amanzi okunatha."
Isakhamuzi seMatopo, uNkosikazi Nolwazi Ndlovu, uthi sokugcwele amathambo enkomo emadlelweni lemadamu.
"Inengi lezakhamizi alisalandeli ukuyabutha izifuyo ezicubela egangeni. Abenye bazibona sezivele sezibola ngoba zingawa ziswele ozivusayo zize zibole abanikazi belokhe bethi zidla amahlanvu zona sezifile."
Abehluleka ukuzithengela ukudla kwenkomo bazibona zisifa phambi kwabo kungelanto abangayenza. UNkosikazi Sipho Ndlovu uthi usefelwe zinkomo eziyisithupha.
"Bengilenkomo ezingu 18, sengifelwe ngeziyisithupha. Izifuyo azilamadlelo lamanzi njalo asikaqali ukuthola ukudla kwezifuyo kuhulumende."
Ingcwethi yezifuyo kugatsha lwezokulima olweAgritex, uMnu Zondani Muchemwa, uthi inkomo ezedlula inkulungwane ezine - 4,172 sezibulewe yindlala, ikakhulu esigabeni seGwanda lapho osokucube ezedlula inkulungwane ezimbili – 2,071.
Uhulumende ngesikhathi ememezela ukuba indlala yalonyaka isiyingozi wathembisa ukuthengela abantu lezifuyo ukudla, kodwa abanye abalimi bathi abakakutholi.
Forum