Abakhokheli bamabandla akuhulumende wenkazatho bamanyene ekusoleni udlakela ngoLwesihlanu emhlanganweni oqoqwe yiJomic njengongo yokukhuthaza ukuthula elizweni.
Umhlangano lo ungenwe ngamalunga amacele womabili eMDC akungatsha zeNational Executives kanye laweCentral Committee yebandla leZanu PF.
Ekhuluma kulumhlangano uMongameli Robert Mugabe usole udlakela esithi kumele abasekeli bamabandla betshiyane lobudlwangudlwangu.
UMugabe ukhuthaze amapholisa ukuba eqhube umsebenzi wawo engathathi ndlangothi njalo engaze avimba abamabandla ezombusazwe ukwenza imihlangano yawo.
Inhloko kahulumende njalo engumkhokheli weMDC-T uMnu Morgan Tsvangirai yena uthe amapholisa kumele ebophe bonke ababangela udlakela abagoqela abebandla lakhe.
UTsvangirai wengeze wathi uzulu kumele elale inkuthazo yokuthula evele kunkokheli kahulumende.
Ekhuluma emhlanganweni munye, umkhokheli welinye lamacele eMDC uMnu Welshman Ncube uthe inkokheli yamabandla kumele ibe lobuqotho nxa isula udlakela.
Iziphathamandla zeZanu PF lezeMDC lazo zikhuthaze ukuthula. Umkhokheli weZanu PF edale lephalamende uMnu Joram Gumbo utshele iStudio 7 ukuthi kuqakathekile ukubana uzulu atshiyane lodlame.
Inkuthazo le iza ngemva kodlakela oluqhamuke eChitungwiza ngeSonto edluleyo lapho abasekeli beZanu PF abatshaye khona abeMDC babavimbela ukuqhuba umhlangano wabo enkundleni yeChibuku.
UNkosikazi Priscillar Misihairambwi Mushonga owecele leMDC elikhokhelwa nguMnu Ncube uthe uzulu kumele ehlalisane ngokuthula.
Kodwa ingcwethi ecubungula ezombusazwe uMnu Brilliant Mhlanga uthe kaboni loludakela luphela.
Kusenjalo, amapholisa athi aseqinisa imizamo yawo yokudinga abayibo ababangele izehlakalo zodlakela eziqhamuke edolobheni le Harare ensukwini ezedluleyo ukwenzela ukuthi bajeziswe.
Lokhu kwenzakala icele le MDC elikhokhelwa nguMnu. Morgan Tsvangirai lisithi amapholisa athatha uhlangothi ngoba engabophi amalunga ezanu pf lanxa kuyiwo abangele udlakela.
Ibandla leli lithi umthethwandaba kamantshi lamuhla walile ukukhulula ngesibambiso sebail uMnu. Boniface Kudakwashe Muchemwa owetheswa icala lokubangela udlakela ngempelanso edluleyo eChitungwiza.
UMnu. Peter Moyo, isiphathamandla secele le MDC elikhokhelwa nguMnu. Morgan Tsvangirai, utshele uSithandekile Mhlanga weStudio 7 ukuthi uzibonela ngawakhe amapholisa ethatha uhlangathi ngakho amazwi awo awathembeki.
