Abakhokheli bamazwe akumanyano weSadc sebekhuthaze abakhokheli bamabandla akuhulumende womanyano ukuthi bagcwalise isivumelwano seGlobal Political Agreement njalo balungisise okuhluphayo phakathi kwamabandla abo.
Abakhokheli laba baphe linkuthazo emhlanganweni weSadc Summit oqale ngoMvulo kweleNamibia. Umhlangano lo ugqitshwe ntambama ngoLwesibili.
UMongameli Jacob Zuma weleSouth Africa ongumlamulankunzi kudaba lweZimbabwe utshele umhlangano lo ngoMvulo ukuthi lanxa kusakhona okuhluphayo phakathi kweZanu PF leMDC, ulethemba lokuthi kusiyaphela umnyaka konke lokhu kuyabe sokulungisisiwe.
Icele leMDC elikhokhelwa nguMnu Morgan Tsvangirai lithi iSadc Troika, yona eqhube umhlangano ihlaziya udaba lweZimbabwe ngeSonto ixwayise ukuthi kwenziwe ukhetho eZimbabwe ngomnyaka ozayo.
Kodwa omunye wabaxwayisi bakaMongameli Zuma uNkosazana Lindiwe Zulu ukulandule lokhu, esithi ngamanga aluhlaza tshoko. UNkosazana Zulu uchasise okunengi ngokuthi iSadc iluphethe njani udaba lweZimbabwe.
