Inkampani yendizamtshina yakweleDubai, iEmirates yazise ngoLwesibili ukuthi kusukela ngenyanga kaMfumfu indizamtshina zayo zizabe seziphaphela eZimbabwe nsuku zonke.
Okwamanje indizamtshina zalinkampani zingena elizweni kahlanu kuphela ngeviki kulandela ukusungula kwayo umsebenzi ngoNhlolanja lonyaka.
Inkampani le ithi okwenze yengezelela inhambo zayo yikuthi kulebhizimusi elithe xaxa.
Ingcwethi ecubungula ezenotho uMnu Nsununguli Mbongolwane utshele iStudio 7 ukuthi ukwanda kwabantu abaya eZimbabwe kubangelwa yikuthuthuka komsebenzi wokwethekelelwa kwelizwe kanye lokubakhona kwamadayimana.
