Uhulumende womanyano usebambisane le nkampani yakwele China, iChina Sonangol, kuhlelo lokuncedisa ekusunguleni amadolobho amancinyane duzane leHarare lapho okuzakwakhiwa khona izindlu zabantu makhaza abathola iholo eliphansi lalabo abahola ephakathi laphakathi.
UMnumzana Ignatius Chombo umphathintambo wogatsha olubona ngezamadolobho kanye lokuthuthukiswa kwenhlelo zemaphandleni utshele amaphephandaba aphansi kukahulumende ukuthi linkampani izakwakha okungamadolobho emhlabathini osanda kutholwa nguhulumende duzane leHarare endaweni ezithi Mount Hampden kanye le Mazowe.
Kodwa-ke uNkosikazi Beatrice Ngwenya umsekeli kamgcinisihlalo wenhlanganiso yezakhamizi zeHarare, eye Combined Harare Residents Association utshele uGibbs Dube we Studio 7 ukuthi izindlu lezi kumele zitholwe ngabantu abadubekayo hatshi abakhokhela ezombusazwe abajayele ukuqambula inhlelo ezinje.
UChombo uthi umhlabathi otholakale eMount Hampden le Mazowe uyisilinganiso sama hectares ayinkulungwane.
Umayor weHarare uMnu. Muchadei Masunda utshele iStudio 7 ukuthi uhlelo lolu luphakathi kwezinye inhlelo zalelidolobho okumele zenziwe zikhangelane lokwakhela abantu izindlu ezilentengo ephansi.
U Masunda uthi udubo olukhangelane lamadolobho eZimbabwe yikuswelakala komhlabathi wokwakhela abantu izindlu njengoba amapulazi athathelwa abamhlophe esenzikini zemaphandleni.
