Inkampani ye Zimbabwe Electricity Supply Authority (ZESA) ithi kayisoze yenelise ukwehlisa umthelo womlilo kagetsi okhuphuke ngoLwesine ngeviki ephelileyo, njengalokho okucelwa nguzulu, ngenxa yokuthi ilakho ukubhidlika nxa umthelo lo ungabiselwa ku 7.53 cents per kilowatt hour.
Umqondisi weZESA uMnu. Josh Chifamba ubikwa ethi umthelo omutsha we 9.83 cents per kilowatt hour ulakho lawo ukukhuphulwa ukwenzela ukuthi inkampani le yenelisi ukulolonga imtshina kanye lokuhlolisisa ukuthi uzulu usebenzisa njani umlilo kagetsi.
UChifamba uthi okwamanje umthelo womlilo kagetsi eZimbabwe uphansi okwamagama nxa kuqathaniswa lamanye amazwe ezansi yezwekazi le Africa.
Uphinde njalo wathi iZESA lokhe ilwisana lokubhadalwa isikwelede sezigidi ezingamakhulu amane lengxenye zamadola eMelika-$450 million esingabhadalwanga nguzulu, ingatsha zikahulumende kanye lamankampani atshiyeneyo.
Uqhubeke ethi kusobala ukuthi iZESA ingeke yehlise umthelo womlilo kagetsi osanda kufakwa.
Ingcwethi kwezenotho uMnu. Masimba Kuchera uthi iZESA ingeke yenza imali loba ingakhuphula umlilo kagetsi ngenxa yokuswela abaqondisi abakhaliphileyo.
Umnu. Roderick Fayayo ongumqondisi we Bulawayo Progressive Residents Association uthi selidumela emansumpeni ukuthi izakhamizi zilwisane le ZESA ezitaladini zako Bulawayo nxa ingehlisanga umthelo womlilo kagetsi.
