Inkampani kagetsi eye Zimbabwe Electricity Supply Authority (ZESA) isiqalisile ukucitsha umlilo kagetsi ezindlini kanye lakumabhizimusi eziphathamandla zikahulumende ezingakaze zibhadale imali yemithelo womlilo kagetsi kusukela ngomnyaka ka 2009.
Umnu. Elton Mangoma umphathintambo obona ngezamandla kagetsi walile ukuveza amabizo eziphathamandla lezi loba kuzwakala ukuthi abacitshelweyo bagoqela uMnu. Ignatius Chombo umphathintambo wezamadolobho kanye loMnu. Christopher Mushowe usibalukhulu wesabelo seManicaland. Omunye njalo nguMnu. Justin Mupamanga unobhala omkhulu uPermanent Secretary wogatsha lukahulumende olubona ngezamandla kagetsi.
IStudio 7 kayenelisanga ukukhuluma leziphathamandla lezi ezilesikwelede se ZESA esedlula inkulungwane ezingamakhulu amathathu lamatshumi ayisikhombisa amadollar eMelika.
Zinengi iziphathamandla zikahulumende ezingabhadaliyo ezibikwa zilakho ukucitshelwa umlilo kagetsi kunsukwana ezilandelayo.
Inkampani ye ZESA ikhala ngokuthi uzulu ulesikwelede somlilo kagetsi esifika izigidi ezingamakhulu amane lamatshumi amahlanu amadollar eMelika.
UMnu. Roderick Fayayo umqondisi we Bulawayo Progressive Residents Association uthi kuyangcomeka okwenziwa yi ZESA.
Kusenjalo, abantu makhaza abanengi abasebenzisa ama kombi edolobheni le Harare bathwele nzima ngokuya endaweni ezitshiyeneyo ngenxa yokuthi abanikazi bezimota lezi bakhuphule imali yohambo lunye yaba lidollar-$1.00 kumbe amabili isuka ku 50c.
Abanikazi bamakombi babikwa bekhuphule imali le besenzela ukudingela amapholisa imali yesivalamlomo.
Izakhamizi zedolobho leli zithi sezithwele nzima ukuya endaweni ezinjenge Epworth, Msasa Park, Hatfield le Chitungwiza lapho okumele zikhokhe amadollar amabili ngohambo lunye.
Zithi kazenelisi ukuyibhadala imali le ngenxa yokuthi abantu abanengi bahola imali ephansi.
Umnu. Andrew Phiri oyisikhulumeli samapholisa uthi kuhle nxa amapholisa egcwele imigwaqo yonke e-Harare kodwa akujabulisi ukuzwa ukuthi kulamanye adinga imali yokufumbathiswa.
