Inkampani elungisa uchago lwempuphu, ilambazi labantwana, labadala, imihlobo etshiyeneyo yokunathwayo okugoqela icoffee yohlobo lwe Nescafe, iziwiji lokunye okunengi, eye Nestle’ isivale ifekithali yayo eZimbabwe, ngemva kweminyaka engamatshumi amahlanu yavulayo.
Inkampani le ithi ivala nje ngokwesabela ukwethuselwa kwezisebenzi zayo ngemva kokumisa kwayo ukuthenga uchago olusuka epulazini lika Nkosikazi Grace Mugabe ele Gushungo estates ngenyanga ka Mfumfu lonyaka.
Ngeviki edluleyo izisebenzi eziyisithupha ze Gushungo Estate zibikwa zihambise imota ebithwele uchago ko Nestle’ ngenjongo yokubamba ngamandla iziphathamandla zalinkampani ukuthenga loluchago.
Ngemva kwamalanga amabili umphathintambo wogatsha lwezabatsha uMnumzana Saviour Kasukuwere lomphathintambo wezokulima uMnumzana Joseph Made babikwa beye koNestle’ lapha abafike bethesa iziphathamandla zalinkampani umlandu wokufakela izizalwane zeZimbabwe izijeziso zenotho.
Ngomvulo odluleyo iziphathamandla ezimbili ze Nestle' zibizwe ngamapholisa eHarare kodwa zakhululwa zingetheswanga cala. Izehlakalo lezi yizo esezibangele ukuthi inkampani le ithi isimisa umsebenzi okwesikhatshana.
Isikhulumeli sayo uNkosikazi Brindan Chiniah utshele umsakazo weStudio 7 ukuthi kulokukhulumisana okuqhubekayo lohulumende ngenjongo yokuxazulula loludaba.
UMnumzana Kasukuwere laye ulandule ukuthi ukuya kwakhe ko Nestle’ yikho okwethusele iziphathamandla ukuthi zicine zivala ifekithali le. Ukuvalwa kwayo kutshiye izisebenzi ezedlula amakhulu amabili zingasela msebenzi.
UMnumzana Walter Nsununguli Mbongolwane ingcwethi kwezenotho, utshele uBrenda Moyo weStudio 7 ukuthi okwenzakale kunkampani ye Nestle’ kutshengisa ukuthi uhulumende weZimbabwe kahloniphi impahla yabantu esithi lokhu kuzaxotsha abavela kwamanye amazwe akade belenjongo yokuletha amabhizimisi abo elizweni.
