Isiphindile njalo inkampani ye ndizamtshina eye Air Zimbabwe ukuthi yehluleka ukubhadala izisebenzi ezinikwe ingxenye yeholo ngoMabasa.
Lokhu kwenzakala kulamaviki amabili uhulumende engenele kunkampani le wayinika imali ukwenzela ukuthi ibhadale abatshayeli bendizamtshina, omanjinela kanye labakhangela uzulu endizamtshineni akade bekhalala umsebenzi ngenxa yokungabhadalwa iholo lama allowances.
Okwamanje izisebenzi lezi zibikwa zihlangene leziphathamandla zenkampani le ngoLwesihlanu lapho ezitshelwe khona ukuthi iAir Zimbabwe kayilamali yokubhadala iholo elipheleleyo.
Izisebenzi lezi zithi zizakwenza omunye umhlangano okuzamele kuphunywe lezinqumo zokuthi ziluphathe njani loludaba.
Umsekeli kanobhala jikelele we Zimbabwe Congress of Trade Unions uMnu. Japhet Moyo uthi okwenzakala eAir Zimbabwe kulihlazo kuzisebenzi lelizwe lonke.
