Inkampani yeForevermark engaphansi kwe De Beers yakwele South Africa ithi kayisoze ithenge amadayimana avela eMarange ngenxa yokuthi mancane kakhulu njalo kawala hlonzi.
Umqondisi wenkampani le uMnu. Stephen Lussier ubikwa eyethule lumbiko esungula umsebenzi we Forevermark lapho athe inkampani le izabe ithenga amadayimana alohlonzi avela emazweni anjenge South Africa, Botswana, Namibia le Canada.
ULussier uphinde wathi kabasoze bathenge amadayimana avela endaweni ezinjenge Marange lapho okuhlukuluzwa khona uzulu ngamapholisa, amasotsha kanye leziphathamandla zikahulumende.
Uthe inkampani yakhe ithakazelela amadayimana athuthukisa inotho kazulu. Kasenelisanga ukukhuluma leziphathamandla ze Forevermark njalo akwaziwa ukuthi iDe Beers emhlabeni wonke jikelele izathenga yini amadayimana eMarange.
Inhlanganiso yeKimberely Process isanda kunika ele Zimbabwe imvumo yokuthengisa amadayimana eMarange akhangelelwe ukulethela ilizwe amabillion amabili amadollar eMelika ngomnyaka.
Inkampani yeDe Beers yake yazama ukwemba amadayimana eMarange kodwa yathi kayitholanga lutho.
Umphathintambo wezemigodi uMnu. Obert Mpofu uthi okukhulunywa yi Forevermark ngamanga ngenxa yokuthi iDe Beers yantshontsha amadayimana eMarange alohlonzi.
Ingcwethi kwezenotho uMnu. Masimba Kuchera uthi okwenziwa yiForevermark kuyasolisa.
Ingcwethi kwezenotho uMnu. Masimba Kuchera uthi okwenziwa yi Foreevermark kuyasolisa
