Umongameli Emmerson Mnangagwa usuke namhla elubhekise kwele Ethiopia emhlanganweni womanyano we African Union. Lokhu sokudale inkulumo yokuthi vele umanyano lo uphathisa ngani nxa ungasoze ukhulume ngokubulawa kwabantu eZimbabwe ngamabutho.
Umanyano we SADC uke wangenela kudaba lwe Zimbabwe ngomnyaka ka 2008 okwabangela ukuthi kubunjwe uhulumende womanyano.
Kodwa kathesi umanyano lo kunye lowe SADC uzithulele ngodaba lwe Zimbabwe olukhanya luqubekela phambili.
Ophatheke kwezombusazwe, uMnu. Abednicho Bhebhe uthi inhlanganiso lezi kumele ziqale ziphiwe ubufakazi bokuthi mpela ilizwe lilodubo andubana angenele.
"Ngezizatho ezifanayo ngibona ingani inhlanganiso lezi kumele zingenele nxa kulalokhwana okuthiwa lubizo. Ukuthi sesilohlupho lapha eZimbabwe sikhangelele ukuthi lisinike uncedo," kutsho uBhebhe.
Okhokhela umanyano we SADC ngumongameli Cyril Ramaphosa wakwele South Africa. Kumaviki amalutshwana asanda kwedlula uRamaphosa uthe akulankinga eZimbabwe njalo izijeziso zenotho ezafakelwa ilizwe kumele zisuswe.
Sixoxe lengcwethi ecubungula ezombusazwe, uMnu. Zenzo Nkomo sambuza ukuthi ulubona njani loludaba.
"Inkinga ye SADC yikuthi iphethwe ngu Cyril (Ramaphosa) njengo chairman. Ama sanctions wona lawo athi kawasuswe katsho ukuthi vele aqala kanjani," kutsho uNkomo.
Ezinye ingcwethi kwezombusazwe zithi umanyano we SADC ukhanya ungemukeli amabandla asacathulayo lanxa eyabe elosekelo lukazulu wamazwe wonala.
Ke sizwe imbono ka Nkomo ngaloludaba:
"Kuke kwaba khona into eke yahlongozwa la, ikakhulukazi ku SADC lapha bekhala ngawo ama party ukuthi ama party amatsha ayizakhiwo ze Europe," kutsho uNkomo.
Ukubulawa lokudlwengulwa kwabantu ngamasotsha lokunye ukwephulwa kwelungelo loluntu kukhanya kungananzwa yinhlanganiso ye SADC leye AU.
Sibuze omela isigaba se Binga North edale lephalamende, uMnu. Prince Dubeko Sibanda ukuthi udaba lwe Zimbabwe aluqakatheskiwa yini zinhlanganiso lezi?
"Ngokubona kwami ayisiko ukuthi loludaba ayisilodaba olumqoka ku SADC laku African Union. Ngokubona kwami bayakubona ukuthi okwenzkalayo kumqoka," kutsho uSibanda.
Osaphethe isikhundla sikamongameli welizwe ngesikhathi uMnangagwa esemhlanganweni we AU nguMnu. Khembo Mohadi.
