Sokuqhamuke ingxabangxoza phakathi kwamacele amabili eZinasu, inhlanganiso ye National Constitutional Assembly, kanye lebandla le MDC elikhokhelwa nguMnu. Morgan Tsvangirai kulandela ukuhlaselwa kwamalunga elinye lamacele EZINASU esikhumbuzweni sika muyi uNkosikazi Susan Tsvangirai ngempelaviki edluleyo.
Amalunga elinye icele leZINASU ambalwa, abikwa elimele kakubi kulandela loludlakela. Inhlanganiso ye NCA, yethule umbiko isola intsha ye MDC ngolweSibili, ngokuhlasela amalunga e ZINASU, njalo isikhuthaze umkhokheli walelibandla uMnu. Morgan Tsvangirai ukuthi akhuze amalunga eMDC ukuthi atshiyane lodlakela.
Kodwa uMnu. Mfundo Mlilo, ongowelinye icele le ZINASU, utshele uSithandekile Mhlanga we Studio 7 ukuthi amalunga e MDC abengasoze ahlasele awe ZINASU, njalo lokhu kungabe kuyisenzo sezephulamthetho.