Abenhlanganiso ephathisa amazwe asathuthukayo ngemali, eyeInternational Monetary Fund (IMF) ithi isigqibe uhambo lokuhlolisisa umnotho wakwele 2024 Article IV Mission lwayo kwele Zimbabwe isithi loba nje umnotho welizwe leli uthembisa, kumele uhulumende alungisise iziqondiso zakhe zomnotho ikakhulu ezokubuthanisa lokusetshenziswa kwemali.
Abe-IMF bathi ezikhona iziqondiso yizo esezidale ukuba idollar leZimbabwe ligugudeke ngesiqhubu esethusayo ngoba kungakhulunywa iqiniso ngesisindo salo nxa liqathaniswa ledollar leMelika.
Lokhu kuphumume emhlanganweni owenziwa phakathi kwesiphathamandla seIMF, uMnu. Wojciech Maliszewski, lomphathintambo wezemali uMnu. Mthuli Ncube.
UWojciech utshele intathelizindaba ngemva kwalumhlangano ukuthi uhulumende weZimbabwe kumele ayekele umkhuba ukusebenzisa imali ngendlela engayisiyo.
“Umnotho kuleli ube ukhula kakhulu kwezokulima lakwezokwemba. Lokhu bekudalwa yikusetshenziswa kwemali yakwamanye amazwe. Sikhuthaza uhulumende ukuba enze ukuba imali ibe lesisindo sayo seqiniso njalo angasebenzisi imali mahlayana nje.’’
Uqhubeke esithi umnotho weZimbabwe usebunzimeni kodwa ulakho ukuthuthuka ngenxa yemisebenzi yezokulima leyozozkwemba amatshe aligugu. Uthi njalo imali ethunyelwa yizizalwane zelizwe ezisebenza emazweni angomakhelwane laphetsheya kolwandle, ngokunye okulakho ukuncedisa ekuthuthukiseni umnotho.
UNcube uthi inkulumo phakathi kukahulumende labeIMF zihambe kuhle kakhulu njalo bayamukela inkuthazo lamacebo abawatholileyo.
“Sifuna ukuba imali yethu iqine. Siyavuma lathi yikho esikwenzayo. Siphinde sakhela ukuba uhulumende kuvuze asebenzise imali ngemfanelo.’’
Ingcitshi zezomnotho zithi lobanje kukhanye umnotho welizwe udonsa nzima kubalulekile ukuba uhulumende afunde ukusebenzisa imali ngemfanelo njalo aphungule inani labaphathintambo bakhe ukuze alondoloze imali.
Enye yalezi ngcitshi nguMnu Rejoice Ngwenya, osebenza lenhlanganiso yeCoalition for Market and Liberal Economics othi udubo olukhona yikuthi uzulu kasamthembi uhulumende we Zimbabwe.
“Abaphathintambo bemali banengi kakhulu elizweni leli. Nxa befuna ukuthi kungabi lenkinga kumali yangaphandle kwelizwe kumele baphungule uhulumende abantu abasebenzayo banengi kakhulu. Njalo umsika wemali kumele uziphathe wodwa hatshi ukuthi bangenele’’
Eyinye ingcitshi ecubungula ezomnotho osebenza lenhlanganiso eye Centre for Disabilithu Zimbabwe, uMnu. Masimba Kuchera owenhlanganiso yeCenter for Disability in Zimbabwe laye ukhala ngokuthembakali kukahulumende ekuphumeni lemithetho engaphathisa ukuthuthukisa umnotho welizwe.
“Uhulumende uyakwazi okumele akwenze. Ungananzelela kulomthetho ophume ngeviki edluleyo okhupha abantu abenza okungekho emthethweni.’’
Inhlanganiso yeIMF ithi umnotho wekwele Zimbabwe uzancipha ngokuyisilinganiso esedlula kancane okuthathu ekhulwini – 3.4 percent.
Uthuthuke ngokuyisilinganiso sokukwedlula kancane okuhlanu lengxenye ekhulwini 5,3 percent nyakenye. EleZimbabwe lilizikwelede zamabhanga lezinye inhlanganiso efika phose amabhiliyoni angamatshumi amabili – US$18 billion uma kubalwa leselehluleke ukuyihlawula ebizwa ngeSilungu ngokuthi ngama-arrears.
Forum