Inhlanganiso yabalwa impi yenkululeko, i Zimbabwe National War Veterans’ Association, ibikwa isidabukene phakathi kulandela imbiko ethi umsekeli kamkhokheli walinhlanganiso, uMnu. Joseph Chinotimba labasekeli bakhe sebehlukane layo.
UChinotimba, ubikwa esithi usetshiyane lobukhokheli bukaMnu. Jabulani Sibanda, hatshi linhlanganiso, njalo ugcizelela ukuthi uSibanda nguye owaxotshwa kulinhlanganiso.
Ngakwelinye icele, u Sibanda uthi uzaqhuba ukhetho olutsha ngempelaviki ezayo, elokudinga ikomiti yokukhokhela linhlanganiso, kodwa u Chinotimba uthi uSibanda kalalungelo lokwenza ukhetho kungela Interim Committee eluqhubayo. USibanda ubikwa esithi uChinotimba uyaziphuphela nje.
USithandekile Mhlanga owe Studio 7 uxoxe lo Mnu. Max Mnkandla, okhokhela inhlanganiso YE Zimbabwe Liberators' Peace Initiative yena othi kusobala ukuthi ababalili laba basetshenziswa yinkokheli yebandla le ZANU PF, layo evele idabukene phakathi.