Abenhlanganiso ezibona ngokuthuthukisa impilo kazulu wakoBulawayo, zilokhe ziqhubeka ngenhlelo zokusiza abatsha kwezemfundo.
Lezi nhlelo eziqhutshwa ngalesi sikhathi izikolo zivaliwe zijonge ukusiza abafundi abangabhali imihloliso abangekhaya, ngalesi sikhathi uzulu weZimbabwe ephakathi kokumelana leCovid 19.
Inhlanganiso yesiphala sengwalo eyeTsholotsho Mobile Library ngeyinye yalezinhlanganiso.
UMnu. Elvis Ndebele, owasungula linhlanganiso, uthi isebasungule uhlelo olujonge ukusiza uzulu ekulwisaneni leCoronavirus, ngokwabela abantu okokusebenzisa ukuzivikela, ukuthelelwa leli gcikwane okunjengama mask, kungela mbadhalo.
“Sibambene ngenhlanganiso ezitshiyeneyo ukuqhuba uhlelo lokudinga ama mask okupha labo ababuya ema clubini ethu, njalo siyathumela imilayezo sisebenzisa ama group ethu kuWhatsApp, siwathumela ezigabeni ezihlukeneyo, nxa abantwana sebehamba kuma reading days bezoboleka amabhuku, siyakhuthaza ukuthi umntwana kumele abuye egqoke imask,” kutsho uNdebele.
UNdebele uphinde wathi inhlanganiso yakhe ilohlelo olujonge ukusiza abafundi abakuzinga leGrade 7, O Level kanye labaku A level, ekuqhubeni izifundo.
“Inhlelo zemfundo ngefoni zisiphe ithuba lokuthi sithuthukise abafundi. Ngesikhathi seCOVID, umuntu kumele ahlale phantsi, njalo besikhuluma ngendaba ye social distancing, so laphana sisuke sakubona ukuthi kufanele ukuthi sithathe ababalisi abambalwa abesigabeni sethu, sasebenzwa ndawonye ngenhlanganiso ezitshiyeneyo. Ngelanga siyathumeza izifundo, abafundi bebale, bexoxisana lababalisi, sebethumela izimpendulo zemibuzo. Lokhu kuyabancedisa kakhulu,” kutsho uNdebele.
