Inhlanganiso zezwekazi leAfrica ezedlula amatshumi amane – 44 zithi kubi kakhulu okwenziwa nguhulumende kaMongameli Emmerson Mnangagwa obopha mahlayana abalwela ilungelo lolungu labaphikisayo ngesikhathi kulungiselelwa umhlangano omkhulu weSADC Summit ozaqhutshwa eHarare.
Inhlanganiso lezi zilobe ugwalo olumumethe amazwi achothoza uhulumende kaMnangagwa zisithi kumele alandela iziqondiso zemithetho elondoloza ilungelo loluntu ogoqela isiqa sesine seSADC Treaty esithi abantu kumele bevikelwe, kulandelwe okufiswa nguzulu njalo lemithetho yelizwe evumela abantu ukuba bebuthane santando njalo belandela amabandla ezombusazwe abawafunayo.
Zithi isisekelo sombuso wele Zimbabwe sikhuthaza njalo ukuba abantu bebuthane lapho abafisa khona njalo bekhululeke kukho konke abakwenzayo. Kodwa bathi uhulumende kaMnangagwa kasakwenzi konke lokhu ngoba ukhahlameza uzulu santando njalo usesebenzisa amapholisa lemithethwandaba ukuvukela uzulu.
Ihlanganiso lezi ezithi sokuzalele ingwe eZimbabwe, zigoqela ezakwele South Africa, Mozambique, Zambia, Ethiopia lezamanye amazwe akuzwekazi leAfrica.
Zigcizelele zisithi ukukhahlanyezwa kukazulu kwaqala kulandela ukhetho olwenziwa ngoNcwabakazi nyakanye olwachothozwa kakhulu yiSADC, European Union lezinye ihlanganiso ezathi kaluqhutshwanga kahle.
Ukuze sihlaziye udaba lolu, sixoxe loMnu. Effie Dlela Ncube okhokhela inhlanganiso yeNational Consumer Rights Association othi kuyethusa okwenzakala eZimbabwe.
Siphinde saxoxa ngodaba lolu loMnu. Munashe Mtutsa okubandla leZanu PF othi ababotshwayo benze amacala atshiyeneyo njalo befuna ukutshotshozela udlakela.
Forum