Inhlanganiso ezizimeleyo, ezigoqela i World Vision, i ORAP lezinye zibikwa seziqalisile ukuholisa abalambayo ukudla, kulandela ukuma kwazo okwesikhatshana zisagcwalisa iziphala zazo, njalo zisithi ziphazanyiswa ngumumo wezombusazwe, obuziphatha ingani zisekela ibandla le MDC. Lokhu kwenzakala inhlanganiso ye FEWSNET isithi ukudingisisa ekwenzileyo ngenyanga edluleyo kuveza ukuthi ukudla sokutholakala ezitolo zemaphandleni kanye lemadolobheni, kulandela ukusetshenziswa kwemali yakwamanye amazwe.
Ukuze sizwe okunengi ngokuphathelene lokudla elizweni, uSithandekile Mhlanga we studio 7 uxoxe lo Mnu. Peter Muchengeti, ilunga lomanyano wenhlanganiso ezilwela ilungelo loluntu i National Association of Non-Govenrmental Organisations, iNANGO, yena othi kuyathabisa ukuthi abaswelayo sebephiwa ukudla ngoba bengayizuzi imali yakwamanye amazwe ukuthi benelise ukukuthenga ezitolo.
