Inhambo zikamongameli Robert Mugabe,ephuma engena elizweni,sezivuse inkulumo kuzulu weZimbabwe okhala ngokuthi ngaye uzinika ithuba lokulungisisa inking ilizwe libhekane lalo.
Lanxa ezinye zalezinhambo umongameli Muabe esiyakuyingena nnjengommeli wenhlanganiso okubalisa eye African Union leye SADC,uzulu uthi ufisa ngaye uthuma abalandeli bakhe kweminye yakhona hatshi ukuba kube nguye kuphela ondiza kokuphela.
Unkosazana Kudzai Gombedza ungowesifazane otshengise ukuzisola kakhulu inhambo zikamongameli Mugabe.
Okuyinto esekelwe ngumnumzana Jabulani Shumba laye othi kuyinto emkhathazayo ukuba undiza kokuphela,kanti ekhaya izinto zimi manzonzo,kudinga yena ukuba azilungisise njengomkhokheli.
UShumba uthi okumethusayo kuyikuba kubiza imali enengi lokhu kuhamba kwakhe uMugabe ebingasiza ukuthuthukisa kwezinye inhlangothi zomnotho.
Zikhona ingcwethi lazo ezinikeze umbono wazo phezu kokuhamba kokuphela kukamongameli Mugabe langokuthi kuphazamisa okunganani kumnotho welizwe.
Umnumzana Pride Mukono utshele iStudio Seven ukuba ngaye unikeza abanye okubalisa abalandeli bakhe kungaba kuhulumende,enhlanganisweni ye SADC leye AU.
UMukono uthi ziphazamisa lempilakahle yakhe lezinhambo njengoba kuzasebenza imali yelizwe ukwemelaphisa lapho engasezwa kuhle njengoba emdala nje.
Okuyinto esekelwe ngenye njalo yengcwethi kwezombusazwe ( Political Analyst ) umnumzana Promise Mkhwananzi.
Kunje umongameli Mugabe mhlaka zimatshumi mabili kusiya kwangamatshumi amabili lanye kuyonale inyanga,( 20 – 21 July ) ukhangelelwe Equatorial Gunea ngensonto lapho aya ukuyangena umhlangano ophezu komkhuhlane we Ebola olandela lo asanda kuvela kiwo owenzelwe e New York kuvhiki ephelileyo.
Lonyaka zande kakhulu lezi nhmabo zikaMugabe ngemva kokuba kebe lithuba leZimbabwe ukuthatha izikhundla zokuba ngumgcinisihlalo enhlanganisweni ezibalisa eye SADC leye AU.
EleZimbabwe likhangelele ukutshiya lesisikhundla sokuba ngumgcinisihlalo weSADC kunyanga kaNgcwabakazi kuwonalo umyaka ka 2015 ( August 2015 ) seliphiwa eleBotswana elikhokhelwa ngumongameli Ian Seretse Khama.