Amadokotela aqhubekela phambili etshengisela phandle kwezibhedlela eHarare lakoBulawayo kulandela ukwala kukahulumende ukuthi akukhulumisana labo ngokubahluphayo.
Odokotela laba, asebelamalanga alitshumi lane bekhalale umsebenzi, bathi ukutshengisela emigwaqweni kuzakwenza uhulumende akhulume labo ngokuthi baholiswe ngamadola lokunye okubakhathazayo okunjengokungatholakali kwemithi lemitshina ezibhedlela.
Bathi bekhalala umsebenzi bazihlalela ezindlini besithi uhulumende uzakhuluma labo. Kodwa uhulumende kakwenzanga lokhu. Wethula umbiko othi kasoze aholise amadokotela ngamadola ngoba ilizwe lithwele nzima ngokudinga amadola.
Okwamanje kulemibiko ethi uhulumende usemise iholo labakhalale umsebenzi.
UDokotela Mthabisi Bhebhe, okunhlanganiso yeZimbabwe Hospital Doctors’ Association, uthi kuliqiniso ukuthi amanye amadokotela ahola $1,500 ngenyanga athole $554 kuphela ngoMpalakazi.
Kasenelisanga ukukhuluma ngodaba lolu leziphathamandla zohlangothi lukahulumende olwezempilakahle.
