Ingwalo zabafundi bezinga eliphansi ezilandela uhlelo olutsha lokufundiswa kwabantwana icurriculum lokhe zingatholakali ezikolo kanye lezitolo zamabhuku kulandela ukuguqulwa kwayo eminyakeni embili edluleyo, lugatsha lwezemfundo.
Ababalisi kanye labazali basebethabile ngokususwa kukaMnu. Lazarus Dokora ukuba ngumpathintambo wezemfundo ukuthi li curriculum ayiseyi kulandelwa kodwa bamangaliswa ngumpathintamo omutsha laye esesithi izolandelwa njengokubekwa kwayo. Bonke bakhala ngokuthi ayizwisiseki osokubangwa ngamandla langokuphuza kokuphuma kwengwalo zangakhona.
UNkosazana Miriam Siwela, ongumbalisi uthi bahlangana lobunzima kakhulu ngenxa yokuthi ingwalo azikatholakali.
Umongameli wenhlanganiso yababalisi bemaphandleni eye Association of Rural Teachers Union of Zimbabwe, umnumzana Obert Masaraure, uthe ukusweleka kwengwalo lokhu kubulala kakhulu abafundi abasezikolo zemaphandleni abangenelisi ukuthola ezinye indlela.
Abazali abanengi bathi ukusweleka kwengwalo sokubadalela indleko ezinengi njalo ukusweleka kwazo ezikolo kutshengisa ukuthi uhulumende wayevele engahlelanga kuhle ekuqaleni.
Umnumzana Abel Moyo ngomunye wabazali abalombono onje. Omunye njalo umzali uthi ingwalo ezinye ziyadula kuthi ezinye azitholakali.
Unkosikazi Anele Mthethwa uthi kuyisimanga kibo ukuthi abantwana bafunda njani njengoba ababalisi bengela ngwalo njalo zingatholakali ezitolo.
Uhlelo lokufundisa abafundi olutsha olweNew Curriculum lwethulwe ngomnyaka ka 2016 yasolwa nguzulu ngoba ababalisi labo lokhe bengakwazi ukufundisa izifundo ezimunyethwe yiyo, njalo ingwalo kunye lokunye okudingakalayo akuzange bakutholiswe ezikolo kuze kube lalamhla lokhu. Izikolo ezisemaphandleni yizo ezisasalele emuva kakhulu ezifundweni lezi. Abogatsha lwezemfundo balile ukuphendula imibuzo ephathelane lecurriculum le kanye lodubo lokungatholakazi kwengwalo.
