Kulabanye abantu abathi umfelokazi uGrace Mugabe usenjengenhlanzi etshelwe ngamanzi ngakho-ke kumele akhothamele uMongameli Emmerson Mnangagwa labanye abakubandla leZanu PF ukwenzela ukuthi agcine inotho yakhe yonke egoqela indlu elohlonzi ebizwa ngikuthi yiBlue Roof.
Abanye njalo bathi umfelokazi ulakho ukusebenzelana loMnangagwa kwezombusazwe bengelakudonselana.
Ibandla leZanu PF lisanda kwethula umbiko othi indlu eyeyihlala owayengumongameli, uMnu. Robert Mugabe, izakwenziwa indawo yokulondoloza imbali, imuseum. Kodwa uMnangawa uthi iBlue Roof izanikwa imuli kaMugabe, owangcwatshwa koZvimba hatshi eNational Heroes Acre lapho owakusakhiwa isihonqo sakhe esibizwa ngokuthi yi-mausoleum.
Abathi uNkosikazi Mugabe usephelelwe kwezombangazwe bagoqela uMnu. George Mkhwanazi ingcwethi kwezombangazwe ezimele yodwa.
“Ngibona engani usephelelwe nguphawu. Akula azwkwenza ngoba wayevele eyame kakhulu kumuyi uRobert Mugabe. Njengoba uMugabe esehambili akuselalutho umfelokazi angakwenza. Angeke akumela okwenzakala kwezombusazwe.”
UMkhwananzi uthi kaboni umfelokazi esebenza loMnangagwa.
“Kumele abone ukuthi kahlokozi indlu kanyolovu ngoba bangamenza okubi ababusayo engamisa umsila ebatshele akufisayo.
Lokhu kusekelwe nguSikhwicamfundo Sabelo Gatsheni Ndlovu.
“Kungenzakala ukuthi engaqhubeka ethola inzuzo njengomuntu olendoda eyayikhokhela ilizwe kodwa enganze okungaqondanga uzahlupheka.”
Kasenelisanga ukuxoxa lomfelokazi uNkosikazi Mugabe okubikwa ukuthi lokhu eyethuswe yikubhubha kukaMugabe. Sehluleke njalo ukukhuluma leziphathamandla zikahulumende. Kodwa-ke uMnu. Believe Gaule uthi uNkosikazi Mugabe ulakho ukusebenza loMnangagwa.
Ibandla leMovement for Democratic Change elikhokhelwa nguMnu. Nelson Chamisa lithi lizimisele ukusebenza labantu abanjengo Nkosikazi Mugabe. UMnu. Nkululeko Sibanda, isikhulumeli sikaChamisa, uthi umfelokazi ulelungelo lokwenza akufisayo kwezombusazwe.
UNkosikazi Mugabe wayekucela elalifuna ukuthi uMnu. Sydney Sekeramai, owakhethwa nguMugabe ukuthi athathe isikhundla sakhe, abengumkhokheli webandla leZanu PF lohulumende nxa uMugabe eseyekele umsebenzi. Lokhu kwabangela ukuthi amasotsha abambisane loMnangagwa basuse uMugabe esikhundleni ngomnyaka ka2017.
