Ingcwethi zezempilakahle zithi ukuqonga kwenani labatholakala belegcikwane leCovid 19, eZimbabwe, kungabe kubangelwa yikuhlala isikhathi eside kwabaphindela ekhaya bevela emazweni angomakhelwane, endaweni zamaQuarantine Centers bengahlolwa ngokuphangisa. Lezi ngcwethi zikhuthaza uhulumende ukuba asebenzise okokuhlola leli gcikwane okungathathi isikhathi eside, amaRapid Test Kits.
Kunje inani lasebetholakele beleCovid 19 elizweni, likhuphuke laya kwabangamakhulu edlula amabili-222 ngoLwesithathu.
Lokhu kutsho ukuba asebegula lumkhuhlane okwamanje sebengamakhulu phose amabili-189, kusinde abangamatshumi amabili lathobamunwemunye-29 kwafa abane. Asebehloliwe ukuba baleCovid 19 loba hatshi, lokhu laqhamukayo eZimbabwe ngoMbimbitho lonyaka sebezinkulungwane ezingamatshumi phose amahlanu-49,603.
Emhlabeni jikelele asebefunyenwe belegcikwane leCoronavirus sebeyizigidi ezedlula eziyisithupha lengxenye-6,608,309. Kuthi asebebulewe yileligcikwane, sebezinkulungwane phose ezingamakhulu amane-388,587, kodwa asebesinde kulumkhuhlane sebeyizigidi ezedlula ezintathu-3,193,865, kubika abenhlanganiso yeWorldometer.
Emazweni awezwekazi leAfrica asebefunyenwe belegcikwane leli, sebezinkulungwane ezedlula ezilikhulu lengxenye-162,673, labulala inkulungwane ezedlula ezine-4,601, kwasinda inkulungwane ezingamatshumi edlula ayisikhombisa-70,475, kubika abenhlanganiso eye African Union.
KoBulawayo kulabantu abayithoba minwe mibili abagulayo umkhuhlane weCoronavirus, abayisithoba munwe munye sebasila kwabhubha oyedwa.
EMatabeleland South kubanjwe abantu abalitshumi lanye igcikwane leCovid-19 abavelele kweleSouth Africa okukhupule inani labantu abalalumkhuhlane kulesisigaba, kumatshumi amathathu lambili kusiyatshona ilanga langoLwesithathu.
Umqondisi wesibhedlela seMpilo Central, koBulawayo, uDokotela Solwayo Ngwenya ukhuthaza uzulu ukuba alandele imilayo yokuvikela ukuthelelwa igcikwane.
"Igcikwane leli linjengomvimbani lilandelana lomqando. Igcikwane leli lingafika lapha lilithole lixokozela phandle kumalayini ngendlela eliyenza ngayo izabulala abantu abanengi umakhaza liyawabona aseseduzane. Uhulumende ufake iziqondiso zokuthi ligqoke amaface mask livale imilomo lamakhala kodwa lina litholakala livale imilomo litshiye amakhala phandle lokhu kuzakwenza ukuthi icorona ilibambe."
"Uthola kundwendwe zempuphu lamabhanga abantu bayaxokozela limele lime kuhle. Umkhuhlane lo ufana leBird flue uthola abantu bekhefuzela bedinga ukuphefumula. Siyalixwayisa kakhulu uma lihamba kumele ligqoke amaface mask kihle lingaphefumulelani lingasondelelani kodwa uma lingakwenzi lokhu abantu abanengi bazatshabalala ngiyalicela Zulu ukuba lilandele imilayo esilipha yona."
Abezempilakahle bakhuthaza uzulu ukuba aqaphele ahlale emakhaya ikakhulu kulezi nsuku inani labatholakala beleCovid 19, liqansa okwethusayo. Abantu bakhuthazwa njalo ukuzivikela ekubambeni leligcikwane bengaphongunyakazela ndawana yonke, beminyezelene ngoba ngaleyo ndlela kulula ukuthelelanwa lumkhuhlane.