Umsekeli wenhloko kahulumende uMnumzana Arthur Mutambara, uthi abakhonona ngokukhethwa kwabameli bamanye amazwe labosibalukhulu bezigaba nguMongameli Robert Mugabe, balakho ukukhweza udaba lolu emthethwandaba waphezulu weSupreme court.
UMutambara ukhulume amazwi la ephendula imibuzo edale lephalamende ngolweSithathu, akhanya esolwa ngabanengi. Ingcwethi ezicubungula ezombusazwe zithi ukhulume into angayaziyo, ezinye zikhuthaza ubudlelwano obuhle phakathi kwamabandla akuhulumende womanyano.
Kumaviki edluleyo uMugabe ukhethe abameli bakwamanye amazwe, wafaka osibalukhulu bezabelo ezikhundleni engakhulumisananga labanye bakhe kuhulumende womanyano. Lelinyathelo livuse ulaka lwenhloko kahulumende uMnumzana Morgan Tsvangirai.
UBrenda Moyo weStudio 7 ukhulume legqwetha uMnumzana Job Sibanda othi uMutambara uqondile nxa esithi loludaba lungalungisiswa ngumthethwandaba weSupreme Court.
