Ingcwethi ezicubungula ezombusazwe sezisole umsekeli kamongameli uMnu. Constantino Chiwenga ngokuchothoza induna yeMasvingo uChirunye kulandela amazwe akhe lapho athe umongamli Emmerson Mnangagwa kufanele aqede inkohlakalo elizweni.
Ekhuluma emhlanganweni wezinduna eHarare ngoLwesihlanu, uMnu. Chiwenga uthe umongameli Mnangangwa ufana le nkosi uMonomotapa, ngakho kasoze avumele ukuthi achothozwe.
Induna uChirunye iphume kumfanekiso ebulenjini be internet isola inkohlakalo eselizweni, isithi kumele ilungisiswe.
UChirunye uthe omkhulu we butho uMnu. Philip Valerio Sibanda kumele enze okwenziwa kowayengumongameli uMnu. Robert Mugabe ngo 2017. Ngalowo umnyaka, uMnu. Mugabe wasuswa embusweni ngemva kokungenela kwebutho.
UMnu. Chiwenga uthe kasoze avumele lokhu okukhulunywe ngu Chirunye.
UMnu. Pride Mkono, ingcwethi ecubungula ezombusazwe uthi amazwi kaMnu. Chiwenga aveza ukuba ungu ntando kayiphikiswa.
Eyinye ingcwethi eyekolitshini leUniversity of Zimbabwe uMnu. Mlindelwa Mancitshana uthi amazwi ka Mnu. Chiwenga aveza ukuba ibandla elibusayo eleZANU PF yilo elibangela inkohlakalo elizweni.
Isikhulumeli se MDC-T uMnu. Witness Dube uthi lokhu kutshengisa ukuba induna kakumela zilandele iZANU PF.
Lokhu kugcizelelwe ngu msekeli wesikhulumeli se MDC Alliance uMnu. Felix Magalela Mafa
Induna ezinengi eZimbabwe zibikwa zibanjwa ngamandla ukuba zisekele ibandla le ZANU PF, kuthi lezo eziphikisayo zandise ukuxotshwa njengalokho okwenzakala ku nduna uNdiweni weNtabazinduna.
Imizamo yokukhuluma leziphathamandla zikahulumende kumbe ibandla leZANU PF ngaloludaba yehlule.
Ucingo lwesikhulumeli se ZANU PF uMnu. Tafadzwa Mugwadi belungasatshelwa.
