Lamhlanje kuhlelo lwemaphandleni sisemaphandleni aweGwanda lapho Izilimo eseziqalile ukutsha emasimini ngenxa yokungani kuhle kwezulu kanye lokutshisa kwelanga.
Inengi lezakhamizi selisesabela indlala embi kakhulu njalo lithi lizafuna olunye njalo uncedo lwenhlanyelo evela kuhulumende ukuze lilime njalo.
Nyakenye ngalesisikhathi umumbu wawusudliwa kweminye imizi ngenxa yezulu elinengi elanayo.
Kodwa lonyaka isimo asithembisi endaweni ezinengi eGwanda lapho umumbu kanye lamabele sesitsha ngenxa yokungani kuhle kwezulu.
Izansi yemaNdebeleni ivele ayitholi zulu elinengi minyaka yonke njalo inengi selilahle ithemba lesivuno esihle lonyaka osekudale ukuthi lesabele indlala.
UMnu. Linos Sibanda yisakhamuzi seNkwalini eMatshetsheni. USibanda uthi usebenzise imali engamadola angamakhulu amahlanu $500 ukuqhatsha ithalakitha yokulima indawo engamahectare amahlanu.
USibanda uthi wahlanyela inhlanyelo elesisindo samakhilogramu angamatshumi ayisikhombisa, i 70kg kodwa okwamanje uhlalele evalweni.
UNkosazana Simangele Ndlovu oweNsindi kuWard 21 phansi kweNduna uMasuku uthi izulu alinanga njengalokhu obekukhangelelwe osekudale ukutsha kwamabele abo. UMaNdlovu uthi bazimisele ukulima njalo nxa bengathola uncedo lwenhlanyelo.
Loba nje abalimisi behlezi bekhuthaza uzulu ukungalimi umumbu wodwa kodwa balime izilimo ezifuna amanzi amalutshwane ezifana lamabele inengi labantu kulesisabelo liqhubekela phambili lilima umumbu.
Esinye isakhamuzi seNkwalini uMnu. Bekezela Moyo uthi nxa uhulumende engabasiza kuzamele alethe inhlanyelo yezilimo eziphanga ukuvuthwa ngoba kungasela sikhathi.
Emhlubulweni weZansi yedolobho le Gwanda eGungwe izulu kubikwa linile ngesonto kodwa besekuvele konakele emasimini.
UMnu. Edgar Ncube oweSimbuka phansi kweNduna uMathe uthi basaludinga usizo lwenhlanyelo ukuze balime kakutsha.
Ababona ngezomumo womkhathi bathi ilizwe leZimbabwe likhangelele ukuthola izulu elinganeno lonyaka. Inengi lithi alikukholwa lokhu ngoba izulu likhanya lingani kuhle selokhu kuqale umnyaka.
Endaweni ezifana laboThornwood eTshideni inengi lokhu lilinde ukulima ngoba izulu lingakani.
Amagagagasi awomumo womkhathi aveza ukuthi akulazulu elizwayo elizakuna eGwanda kuviki ezayo okungadala ukutsha kwezinye njalo izilimo.
