Inhlanganiso tshotshozela ukulotshwa kwesisekelo sombuso esitsha eyeNational Constitutional Assembly isikhuthaze izisebenzi ukuthi zingemukeli isisekelo sombuso esitsha esilotshwa ngamalunga edale lephalamende awezombusazwe, ngoba singamumathanga izifiso zikazulu.
Embikweni ewethule itshayela izisebenzi ihlombe ngaphambilini kwelanga lokunanza umsebenzi owenziwa yizisebenzi eleWorkers Day ngoLwesibili, iNCA ithe izisebenzi kumele zilwele amalungelo azo, agoqela iholo eliphezulu.
Inhlanganiso le ixwayise izisebenzi ukuthi zingaze zemukela isisekelo esitsha, isithi ukulotshwa kwaso akwenziwanga ngemfanelo.
Ngalokho, isiphathamandla seNCA, uMnu Alois Dzvairo uthi okuzaphuma kusisekelo lesi akusoze kuveze intando kazulu.
Kodwa unobhala jikelele wenhlanganiso yezisebenzi, uMnu Japhet Moyo, engowecele leZCTU elikhokhelwa nguMnu George Nkiwane yena othi inkuthazo yeNCA kabasoze bayilalele.
UMoyo uthi lanxa inhlanganiso yakhe isola indlela isisekelo esilotshwa ngayo yiCOPAC, izamelela ugwalo oluzakuya kureferendum ibone ukuthi lulungile na kumbe hatshi ukuba yisisekelo selizwe.
Kunjalo nje, amacele womabili eZCTU azaqhuba imikhosi etshiyeneyo ngoLwesibili yokuthakazelela iWorkers Day. Icele elikhokhelwa nguNkiwane lizabe liseGwanzura Stadium.
Inhloko kahulumende uMnu Morgan Tsvangirai uzabakhona kulumbuthano. Ngakolunye uhlangothi, icele elikhokhelwa nguMnu Lovemore Matombo lona lizakwenzela umkhosi walo eHarare Gardens.
Embikweni awethule ngoMvulo umkhokheli welinye lamacele eMDC njalo engumphathintambo obona ngezamaIndustry uMnu Welshman Ncube uthe ibandla lakhe litshayela ihlombe zonke izisebenzi.
Uthe uhulumende kumele alungisise izikhalazo zazo, ikakhulu udaba lweholo, abantu bathole imisebenzi. Uthe njalo kumele kuvuselelwe inkundla yeTripatite Negotiating Forum.
