Inani labantu ababanjwa belomkhuhlane weCovid-19 lababulawa ngumkhuhlane lo, koBulawayo liya liqansa ukwedlula kwamanye amadolobho elizweni, osekulethe ukukhathazeka phakathi kwezakhamizi zaleli dolobho lengcwethi zezempilakahle ikakhulu khathesi izikolo sezivuliwe
I-Covid-19 isibulele abantu abanengi emhlabeni jikelele kodwa eZimbabwe lumkhuhlane ubusuveza ukuthi unganeno ngaphandle kwakoBulawayo lapho okhanya usuqalile ukukhwaza ngolaka.
Lisiyatshona ilanga langoLwesibili koBulawayo besekulabantu abedlula amakhulu amabili lengxenye-256, abahlolwe batholakala beleCovid-19. Leli gcikwane selibulele abangamatshumi amabili kuleli dolobho kusukela mhlazilitshumi ngoMfufu kusiyafika olweSibili lwale iviki.
Uma kuqathaniswa leHarare ngesikhathi esifanayo abantu abangamatshumi amahlanu lasificamunwe munye 59 bahlolwe bafumanwa belegcikwane leCovid-19 kodwa akulamuntu osethe walahlekelwa ngumphefumulo.
Izakhamizi zakoBulawayo zikhathazekile kakhulu ngenani labantu abahlaselwa yiCovid-19 lababulawa yilo umkhuhlane lobanje abezempilakahle bengatsho isizatho esibambekayo.
Isakhamuzi sakoBulawayo uMnu Mqondisi Moyo uthi wesabela abantwana ezikolo.
“Sesisesabela ukuba iCovid izamemetheka kakhulu ezikolo ngoba abantwana asiboni ukuba bezenelisa ukulandela iziqondiso zokuzivikela ekubambeni lumkhuhlane njalo kwezinye izikolo amasanitizer avele awakho. Siyesaba njengabazali ukuthi iCovid izamemetheka.”
UNkosazana Nkosinesisa Ndlovu uvumelane loMoyo ethi bahlalele evalweni ngoba akulamanzi ezikolo.
“Lapha yikholapho iCovid ezaqalakhona ukuthi imemetheke iphume ezikolo ibuye ezindlini. Abantwana ngeke benelisa ukulandela iziqondiso zokuzivikela. AkusiCovid kuphela koBulawayo, akulamanzi ezikolo, ngabe izikolo bayatholisa konke okufaneleyo njalo labanye abafundi abalawo amamask ngoba abazali bengenelisi ukuthi bawathenge.”
UMqondisi wesibhedlela seMpilo Central Hospital uDokotela Solwayo Ngwenya uthi lumkhuhlane usuqalile ukubulala abantu njalo usubulala ukudlula ngesikhathi uqala.
UDokotela Ngwenya uqhubekele phambili ekhuthaza abantu ukuba bazivikele ekubambeni lumkhuhlane ethi awelapheki njalo abakatholi umuthi wokuwenqabela ngoba uligcikwane eliphefumulelwanayo.
“Umkhuhlane weCorona virus usuqalile ukubulala abantu, liziphathe bantu usumemetheka okwesibili ususedlula ngesikhathi uqala ngoMbimbitho sicela lilandele iziqondiso zakuqala, lingaminyani, lingayi ezimfeni libanengi siyalicela bantu bakithi.”
Uhulumende kanye lengcitshi zezempilakahle bakhuthaza uzulu ukuba aqhubeke ezivikela kulo umkhuhlane engayekethisi ekulandeleni iziqondiso ezibekwe nguhulumende labenhlanganiso yomanyano wamazwe womhlaba eye World Helath Organization-WHO, ngoba awukapheli.
Kunje eZimbabwe jikelele sebezinkulungwane ezedlula ezithobaminwe mibili-8,610, asebetholakale belegcikwane leli elizweni, lokhe laqhamukayo ngoMbimbitho lonyaka. Abasile kulumkhuhlane sebesedlula inkulungwane ezithobaminwemibili-8040.
