Abaphila ngokuthengisa laba bebebuthene koBulawayo emhlanganweni oqoqwe yinhlanganiso yabo eye Bulawayo Vendors and Traders’ Association (BVTA) lapho abakhulume kabanzi ngobunzima abahlangana labo ngenxa yemithetho le eloncindezelo.
Ekhuluma emhlanganweni lo inqgwetha elilwela amalungelo oluntu umnumzana Tineyi Mukwevo uthe nxa kuqhathaniswa imithetho kakhansili kanye lekusisekelo sombuso kusobala ukuthi akusahambelani, ethi umthetho lo oka1976 uphambana lokumunyethwe yisisekelo sombuso esipha uzulu ilungelo lokusebenza ekhululekile.
Umqondisi wenhlelo zeBVTA umnumzana Michael Ndiweni, uthi umthetho we Urban Councils Model Walkers and Street Vendors By-law usumdala kakhulu njalo wenzelwa ukuncindezela abensundu ngakhoke usutshiywe yisikhathi. Ophila ngokuthengisa koBulawayo unkosikazi Stella Pfumayi uthe imithetho emidala le iyancidezela ngoba ingabavumeli ukuthengisela edolobheni.
Evumelana loPfumayi unkosikazi Lillian Musipani uthe imithetho le ilemigoqo eminengi esipha isibonelo sentengo yesithupha sezempilakahle, i-licence athi iyadula kakhulu kumele ukhansili ayehlise. I-licence le ingamadola angamatshumi ayisitshiyagalombili kodwa inengi labathengisayo bathengisa izito ezingalethi imali enengi.Unkosikazi Sizalobuhle Mabhena uthe imithetho le yenza ilicense idule kakhulu njalo kunzima ukuthi bayithole.
Abaphila ngokuthenga lokuthengisa bakhala ngokuthi babhekane lenhlupho ezinengi ezigoqela ukusweleka kwendawo zokuthengisela ezihlanzekileyo, izambuzi lamanzi endaweni abasebenzela kuzo.
