Umsekeli kamongameli welizwe, uMnu. Phelekezela Mphoko ngeviki edluleyo ukhuthaze ilizwe ukuthi lithandazele izulu kusukela ngempelasonto.
Lakanye ngempelasonto kune izulu elinengi kakhulu endaweni ezitshiyeneyo zelizwe. Kodwa abasola uMphoko ngabathi abezomkhathi kade bevele bethe izulu lizakuna ngempelasonto.
UMphoko uthi imithandazo le kumele iqhubeke kuyonale iviki. Umfundisi Useni Sibanda utshele iStudio Seven ukuthi imikhuleko lenge mpela yiyo eyenze izulu line.
"Okwakuqala okumele abantu bebekwazi yikuthi amabandla eZimbabwe kusukela mhlaka 1 January kuzekuyefika mhlaka 31 minyaka yonke, yisikhathi sokuthandaza lokuzila, leyo yinto eyaziwayo vele," kutsho uSibanda.
Wengeze esithi amabandla ayevele ekhulumile phambilini ukuthi kwenziwe imithandazo yokuthandazela izulu. Uthi labo bayakwamukela ukuthi uhulumende laye ucele ukuthi kuthandazelwe izulu, egcizelela abavele behlala bekwenza.
"Ngakho ke ukuna kwezulu lokhu ngiyabona ukuthi kuyibufakazi bokuthi imithandazo isiphenduliwe njalo kuyatshengisa ukuthi abantu beZimbabwe bengahlangana bathandazele ulutho lucina lufezekile ulutho lwankona", kutsho uSibanda.
USibanda uthi imithandazo le izaqhubekela phambili kuze kuyephela linyanga kaZibandlela, lanxa belemibuzo kuhulumende ukuthi kanti vele ulecebo bani lokuhlenga uzulu ebunzimeni akubo.
Ephendula umbuzo wokuthi abezomkhathi bebevele bethe izulu lizakuna ngempelasonto uSibanda uthe: "Izulu vele lanxa abezomkhathi bebekhulumile angithi lilethwa ngunkulunkulu."
