EleZimbabwe selenelise iminyaka engamatshumi amane lathola uzibuse kunyanga edluleyo lingela misakazo yezabelo eyeneleyo osokubangele ubunzima ekusakazeni imbiko etshiyeneyo ngesikhakhi ilizwe likhangelele ukunanza ilanga leWorld Press Freedom Day ngeSonto.
Isiphathamandla senhlanganiso ebona ngamalungelo entathelizindaba eyeMedia Institute of Southern Africa- Zimbabwe, uMnu Clarence Siziba uthi ukusilela kwemisakazo emakhaya kudale ingxaki ekusakazeni umkhuhlane weCOVID-19.
Isakhamuzi seMabonyane eKezi uMnu Whiteman Moyo uthi uhulumende kakafinyeleli ukubasiza ngolwazi lwalumkhuhlane.
Isakhamuzi seNkayi, uMnu Shooter Ngwenya uthi abazi lutho ngegcikwanene leCovid-19 bezwa ngabanye.
UMnu Gabriel Tshabangu owe Gokwe eNyaje uthi abazi kabaziswanga ngalokhu nguhulumende.
Intathelizindaba zithi ziyahlukuluzwa selokhu kwaqala ilockdown lapho eziyithoba minwe mibili zibotshiwe kwathi ezinye zahlukuluzwa ngabezomvikela kwaze kwangenela idale lomthethwandaba ukubavikela.
Umphathintambo wogatsha lwezokwethulwa kwemibiko uNkosikazi Monica Mutsvangwa uthi uhulumende uqakathekisa ukuthi intathelizindaba zisebenze zikhululekile zingahlukunyezwa kodwa kazange atsho lutho ngemisakazo yezabelo.