Imidlalo yenguqu esigabeni se Castle Premiership ingena kuviki yamatshumi amabili lane kulomdlalo ogobhozisa amathe phakathi kweqembu elihlezi phezu kwengalane ele Chicken Inn leqembu eliphethe isicoco se PSL ele Dynamos ngeSonto.
Iqembu le Chicken Inn lizabe lingela mvimbi uPassmore Bernard ngeSonto njengoba lumdlali engomunye wabadlali abamiswe ukuphatheka kumidlalo yalimpelaviki yinhlanganiso ye PSL ngemva kokuba betshengiswe ikhasi lombala olithanga kathathu kumidlalo eyadlulayo.
Abanye abadlali abangasoze bedlale kulimpelaviki ngabagoqela uPeter Muzondo oweqembu le Triangle, uGerald Takwara ikanti iqembu leWhawha lizabe lingela badlali ababili abathi u Livingstone Genti kanye lo Vimbai Madamombe.
Umdlalo weqembu le Chicken Inn lele Dynamos uzakuba senkundleni ye Barbourfields ngeSonto ikanti imidlalo iyaqala ngoMgqibelo lapho iqembu le Tsholotsho elizadlala khona lele FC Platinum enkundleni ye Luveve.
Kweminye imidlalo yangoMgqibelo iqembu le Flame Lily lizadlala lele ZPC Kariba enkundleni ye Lafarge, iqembu le Chapungu lizangqikilana leqembu le Buffaloes ngase Ascot kuthi iqembu le Harare City lizadibana lele Triangle enkundleni ye Rufaro.
Iqembu le City lele Triangle adibana kungensuku ngaki etshayane kumncintiswano we Chibuku Super Cup lapho ele Harare City elibhaxabule khona ele Triangle nge 5 ka nya.
Kweminye imidlalo yangeSonto iqembu le Caps United lizemukela iqembu le Caps United enkundleni ye National Sports, iqembu le Whawha lizadibana lele How Mine enkundleni ye Ascot kuthi iqembu le Dongo Sawmill lizadlala lele Hwange enkundleni ye Vengere.
.........................................................
Sikhangele umdlalo kakhilikithi,
Iqembu elimela ilizwe le Pakistan emdlalweni kakhilikithi lise Zimbabwe ukuzodlala imidlalo emibili eyohlobo lwe Twenty20 kanye leyemithathu eyohlobo lwe One Day International.
Limidlalo izadlalelwa enkundleni ye Harare Sports Club njalo iqala ngeSonto.
Iqembu le Pakistan lifike kwele Zimbabwe ngoLwesine ntambama njalo libuye lingela abanye abadlali balo abagoqela ukaputeni weqembu uAzhar Ali kanye lomsekeli wakhe uSarfraz Ahmed kodwa umqeqetshi waleliqembu uWaqar Younis uthi ukungabi khona kwabo akutsho ukuba badelela iqembu le Zimbabwe.
