Iqembu elihlezi kundawo yakuqala engalaneni ele Chicken Inn linqotshwe ngele Hwange nge 1 ka nya emdlalweni obusenkundleni ye Luveve ngoMgqibelo okutsho ukuba liyala lilokhu lilemiklomelo engamatshumi amane.
Kundawo yesibili kuleqembu le Triangle lona elibe ngutshiki lobhanqa lele How Mine kungela elenelise ukulitshayela emambuleni ngeSonto eMagumeni.
Iqembu le Triangle lilemiklomelo engamatshumi amathathu lesithupha njalo lilingene lele Dynamos elihlezi kundawo yesithathu kuthi ele How Mine lilemiklomelo engamatshumi amathathu lanye.
Iqembu le Dynamos libe ngutshiki lobhanqa 1 ka 1 lele Tsholotsho njalo umqeqetshi weqembu le Tsholotsho uLizwe Sweswe uthi limpumela izakupha abafana bakhe isibindi kumidlalo elitshumi eseleyo.
Kube lemidlalo eminengi ephele amaqembu engutshiki lobhanqa egoqela obuphakathi kweqembu le FC Platinum lele ZPC Kariba ophele kungela qembu elenelise ukulitshayela emambuleni kwaba lempumela efanayo futhi phakathi kweqembu le Caps United lele Dongo Sawmills.
Iqembu le FC Platinum lilemiklomelo engamatshumi amathathu lanhlanu kuthi ele ZPC Kariba lilemiklomelo elitshumi lathoba minwe mbili njalo lilingene ngemiklomelo lamaqembu athi ele Flame Lily, Tsholotsho lele Whawha.
Iqembu le Whawha litshaye ele Highlanders nge 1 ka nya kuthi ele Flame Lily litshaye ele Chapungu nge 2 ka 1.
....................................................................
Isigaba se Manicaland yiso esiphume sikundawo yakuqala ekupheleni kwemidlalo yabatsha eye National Youth Games ebisedolobheni le Mutare ensukwini ezedluleyo.
Isigaba se Manicaland sithole imendulo zegolide ezilitshumi lambili kuthi kundawo yesibili kubeleqembu le Harare ngemva kwalo kundawo yesithathu kuleqembu le Mashonaland East.
Kundawo yesine kubeleqembu le Masvingo kuthi kundawo yesihlanu kuleqembu le Mashonaland West.
Iqembu le Matabeleland South liqede likundawo yesithupha ngemva kwalo kuleqembu lako Bulawayo eliqede likundawo yesikhombisa.
Kundawo ezintathu zokucina kube lamaqembu athi ele Mashonaland Central, ele Matabeleland North kuthi emsileni kutholakala iqembu le Midlands.
Limidlalo iphazamiswe yikuba ezinye izigaba ezigoqela iHarare le Matabeleland South zibe labadlali ababiselwe emuva ngemva kokwehluleka ukubhadala imali yokubhalisa engamadola angamatshumi ayithoba minwe mbili umdlali ngamunye.