Imidlalo yeligi iyahlaba ikhefu kulimpelaviki njengoba amaqembu amela amazwe emdlalweni wenguqu eyabe ephatheke kumncintiswano wokudinga amaqembu azakuyadlala kumidlalo ye African Cup of Nations kanye leye Euro 2016.
Iqembu elimela ilizwe le Zimbabwe lizadibana leqembu elimela ilizwe le Guinea ngeSonto enkundleni ye National Sports Stadium emdlalweni ozatshengiswa kumabonakude we Supersport.
Lesisehlakalo esokuphuma kumabonakude sibikwa sizalethela inhlanganiso ye Zifa inkulungwane ezingamatshumi amane zamadola aseMelika okuyimali engaphathisa linhlanganiso ukuba ibhadale abadlali bona ababikwa bengazange bephiwe imali zabo ngemva kokudlala leqembu le Malawi emdlalweni wakuqala owesibaya sika Group L wona ophele iqembu le Zimbabwe linqobe nge 1 ka nya.
Amalungiselelo alumdlalo abengekho mahle kungenxa yokuba abadlali bephuze ukufika elizweni ngoba inhlanganiso ye Zifa iphuze ukubathumela amatikiti endizamtshina ikanti kube losuku lapho abadlali abake baswela ukudla okuyinto ephazamise inhlelo zokuzilolonga.
Iqembu le Guinea linqotshwe nge 1 ka nya liqembu le Swaziland emdlalweni walo wakuqala okutsho ukuba lawamaqembu angena kumidlalo yangempelaviki iqembu le Swaziland lele Zimbabwe kuyiwo ahlezi phezu kwengalane yemiklomelo.
Komunye umdlalo wesibaya sika Group L iqembu le Swaziland lizemukela iqembu le Malawi.
Amaqembu azaphutsha imidlalo ehlezi phezu kwengalane yemiklomelo kusibaya ngasinye yiwo azakuyaphatheka kumidlalo ye African Cup of Nations ezaqhutshelwa elizweni le Gabon ngomnyaka ka 2017 ndawonye lamaqembu amabili ayabe ephutshe ekundawo yesibili engalaneni ayabe ebuthelele imklomelo eminengi ukwedlula amanye ayabe ekusimo esifanayo.
.................................................
Imidlalo ye African Games yona eyayisaziwa ngegama elithi All Africa Games iqale namhla elizweni le Congo Brazzaville.
Ele Zimbabwe limelwe ngabadlali abagoqela iqembu lamajaha aleminyaka engaphansi kwamatshumi amabili lantathu abamela ilizwe emdlalweni wenguqu.
Leliqembu lama Young Warriors lifakwe kusibaya sika Group A ndawonye lele Congo Brazzaville, ele Burkina Faso kanye lele Sudan.
Leliqembu liqeqetshwa ngumqeqetshi weqembu le Hwange uNation Dube njalo lizadlala umdlalo walo wakuqala ngoMvulo lapho elizadibana khona lele Burkina Faso. Ngokwesithathu ukuba iqembu elimela iZimbabwe emdlalweni wenguqu liphatheke kulimidlalo njalo like latholakala ngomnyaka ka 1991 elizweni lase Gipite langomnyaka ka 1995 lapho ilizwe le Zimbabwe okwakuyilo elaqoqa limidlalo.