Sokubhubhe omunye njalo umntwana elokitshini leSoweto ngemva kokudla ukudla akuthenge esitolo esisathuthukayo esikasomabhizimusi wokuza.
Lokhu sokudale ukufuthelana okukhulu osekutshiye izizalwane zakweleSouth Africa zitshaya phansi ngenduku zisithi azisafuni kubona ngitsho loyedwa umuntu wokuza oqhuba ibhizimusi lezitolo ezincane lezi.
Amapholisa abhule omkhulu umlilo eDiepkloof eSoweto ngesikhathi izakhamizi zifuna ukudlithiza ngamazinyo abokuza abebethengisa esitolo sokudla esisathuthukayo okucatshangelwa ukuthi yiso esithengise ukudla okubulele ingane.
UKhansila weSoweto uNkosikazi Brenda Dammie utshele iStudio 7 ukuthi lingane efileyo labangane bayo abathathu ithenge amachips kulesisitolo ngemva kwalokhu waqala ukuhlanza egunqula amehlo etshengisela ukuzwa ubuhlungu esiswini. Uhle wafa engakafiki esibhedlela kwathi abangane bakhe ababili omunye uphenduke esibheldlela kanti omunye ulokhe ebangwa lezibi.
“Simeleni? How many? Ngoba abantwana bathu bayashona. Umntwana ngumntwana ma ethola imali uzogijima ayothenga ama snacks. Mina inhliziyo yami ibuhlungu kabi. I’m hurting as a parent. I’m hurting as a community leader ukuthi all over abantwana bayafa sithini.”
Isakhamuzi seDiepkloof uMnumzana Moses Botsi uthi ngemva kwalesi isehlakalo, abokuza bonke abalalezi izitolo abaphume baphele eSoweto kungakonakali.
“Amashop lawa awavalwe ukuze abantwana baphile. Ngithi amaspaza shop wonke avalwe lamaPakistani babuyele la abaphuma khona ngoba basibulalela abantwana. Babulala iyouth yethu. Babanikeza lamadrugs bebathengisela lamadrugs so they must go.”
Umkhokhelki wenhlanganiso yeOperation Dudula eyaziwa kakhulu ngokungemukeli abokuza kumabhizimusi aselokitshini lemisebenzini engadingi makhono, uNkosazana Zandile Dabula uthi uhulumende weSouth Africa useyehlulekile ukuvikela izizalwane zakhe ngakho sokudingakala ukuthi izizalwane zakweleSouth Africa zizivikele.
“Silokuu siluza ingani zethu and we have a president that keeps prioritising foreigners over us as citizens of this country. I think the only solution to this thing is ukuthi they need to declare istate of emergency because we are in a crisis. We have an influx of foreigners they come in and out. They don’t respect the laws of this country.”
Lesi sehlakalo senzeka ngesikhathi uMongameli Cyril Ramaphosa esanda kumemezela ukuthi bonke abalezitolo ezisathuthukayo lezi kufanele babhalise kabutsha, baphiwe imvumo entsha kulandela ukufa kwabantwana asebefika amatshumi amathathu (30) ngemva kokudla ukudla abakuthenge kulezi zitolo eziqhutshwa kakhulu ngabokuza.
Okuviyo labesifazana kubandla lePatriotic Alliance uNkosazana Victoria Africa uthi akusoke kwenzeke ukuthi bavumele ngitsho loyedwa umuntu wokuza ukuthi abhalisele ukuqhuba ibhizimusi lezitolo lezi ezincane.
“IPresident yethu iyasidelela akasihloniphi as a country. Ngeke sithi simtshela ukuthi kuleproblem yena athi bayoregister. Ucabanga ukuthi lezinto abasithengisela zona zizotshentshwa yindaba yamaphepha?”
Uhulumende uthi bonke abaqhuba amabhizimusi okudla kuzafuze babhalise ngemva kokuhlolwa kwendayo abathengisela kuzo kanye lamaphepha abo okuba kweleSouth Africa ngokusemthethweni. Inengi labeZimbabwe lithi lokhu kuzabathwalisa amagabha avuzayo njengoba indawo abathengisela kuzo zingeke ziphasiswe kanti abanye bathi abalwo amaphepha afunekayo ukuze babhalise. Inengi labo bathengisa ukudla okuphekiweyo emalokitshini abalisa iHilbrow, Berea, Yeoville, Tembisa leBraamficher eSoweto.
Forum