Umabhalani omkhulu kumanisipala weHarare, uTown Clerk uDr Tendai Mahachi, usenikezwe insuku ezimbili zokuveza ubufakazi bokuqatshwa kwakhe ngasikhathi sinye uMayor walelidolobha esithi lokhe esekuphumuleni, ukuze kuhlolisiswe phezu kwendaba zakhe.
Emhlanganweni lentathelizindaba owenzelwe esigodlweni samahofisini kamanisipala eHarare ngoLwesibili emini, uMayor Bernard Manyenyeni, uveze ukuba kunengi osekucelwe uMahachi ukuba akuveze okubalisa isimo semali eholwa ngabalezikhundla eziphezulu, kodwa lokhu engakakwenzi, eqhubeka eqholoza.
UManyenyeni uthi kusukela nyakenye, imizamo yokuba kwazakale ukuba useleminyaka emingaki yokuzalwa uMahachi ukuze kwazakale ukuba ungomunye walabo okumele bayephumula abayabe sebedlulise iminyaka ephezu kwengamatshumi ayisithupha.
Uzulu weZimbabwe uthi ukhathazekile ngalobu buqholo bukaDr Mahachi, bokungazihluphi ukulalela akutshelwayo sikhathi sonke.
Umnumzana Thomas Dube wasemzini weWestlea uthi kasiyonto ebamangalisayo ngoba etshengisa izenzo zomuntu owazi ukuba kukhona akuthembileyo.
UDube uthi laleyo nguquko esithe yaba khona kubaphathintambo, sekulomutsha okhangela uhlangothi olusebenza labomanisipala, ingamethusi kangako uMahachi.
UMayor Manyenyeni utshele intathelizindaba ukuba ngemva kokubonisana lobengumphathintambo wentuthuko yezabelo, uDr Ignatious Chombo kuvunyelenwe ukuba kudingwe indlela ezaphathisa ekuthini aye phumula uMahachi.
Wathi kulapho uMahachi avume ukuyaphumula ekupheleni kwawonalo umnyaka ngasikhathi sinye kudingwa ongathatha isikhundla sakhe oyingcwethi kulumsebenzi.
Ethi yikhona ezahlala phansi lomphathintambo omutsha wokuthuthukiswa kwezabelo umnumzana Saviour Kasukuwere, amazise isimo esiyiso kumanisipala weHarare kanye lokuchaza ukuba kungani kuthiwe akaye phumula uMahachi kancinyane, kusahlolisiswa okumele kukhangelwe ngaye.