Omela ibandla lamaDemocrats kukhetho lukaMongameli waseMelika, uNkosikazi Kamala Harris, yena ovela esigabeni esilemihlobo yabantu ehlukeneyo, udlale indima ebanzi kwezombusazwe engumqaphi ophoqelela ukulandelwa kwemithetho futhi ofuna inguquko.
Le yindlela uNkosikazi Harris achaze ngayo unina ekhuluma emhlanganweni weDemocratic Party, “Umama wayengumuntu okhaliphileyo, omude, onsundu futhi wayezwakala nxa ekhuluma ngesingisi ukuthi ayisilo limi lwakhe."
Umlando kaHarris uqala endaweni ezihlala abanengi eSan Francisco Bay lapho azalelwa khona ngo1964.
Abazali bakhe babengabantu bokuza. Unina uShyamala Gopalan owayevela eIndia loyise uDonald Harris, owayedabuka eJamaica, bahlangana eBerkeley, eCalifornia, befunda eUniversity of California.
Ngeminyaka yabo 1960 iBerkeley kwakuyinsika yokulwela amalungelo abantu abansundu. UHarris uthi akukhumbulayo ngalezonsuku yikuthi abazali bakhe babesiya emihlanganweni yomzabalazo laye bemfuqa ngokuyinqodlana kwabantwana.
Kwathi kufika umnyaka ka1970, abazali bakhe basebehlukene.
UShyamala Gopalan wasuka labantwa bakhe abangamakhazana ababili wayaloja kwesinye isitezi eBerkeley, okuyindawo eyaziwa njalo ngokuthi yiFlatlands.
UCarole Porter ngumngane wakhe avela laye khatshana besangabantwana: "I-flethi labo lalilamakamelo amabili kanye lendlwana yokugezela eyodwa njalo laliphezu kwendawo yokugcinela abantwana, iShelton's Daycare.”
UCarole Porter loKamala Harris bahlangana okwakuqala esilindweni sebhasi. Uthi, “Saba yi-class yesibili eBerkely ukuhlanganiswa abafundi abamnyama labamhlophe kuqedwa ubandlululo ezikolo zikahulumende.”
UHarris wasuka wayafunda eHoward University, okulikolitshi elilomlando wabafundi abansundu wasesiyafundela ezemithetho.
Ngesikhathi abesilisa abansundu bebotshwa ngobunengi eCalifornia, wangena emsebenzini wokuba ngumtshutshisi, okungumsebenzi ochothozwa ngabansundu abanengi.
UPorter uthe, “Wathatha isikhundla lesi ukuze eguqule izinto futhi eqede ukubotshwa kwabantu mahlayana okwakusenzakala, khona okwakugxile kakhulu ekubandlululweni kwabantu ngemihlobo.”
Ngo2002, uHarris wangena kukhetho lokudinga igqwetha elikhulu esigaba seSan Francisco, uDistrict Attorney encintisana lomuntu owayephethe lesisikhundla.
“Isikhundla lesi sasingakaze siphathwe ngumuntu wesifazana. Wayengumuntu ophansi kodwa wayelokuthile okubalulekileyo,” kutsho okhankasela abesifazana bebandla lamaDemocrats uAndrea Dew steel.
UHarris wanqoba kulolukhetho wahle waqala umsebenzi wavalela izigebengu ezinengi ezilodlakela ejele futhi waqhelisa izigwebo zabo.
Labo ababedliwe licala okwakuqala lalabo ababedala amacala angeladlame wabafaka kuhlelo lwakhe lokuphathisa izibotshwa ukuthi zibe ngabantu abangcono olwalubizwa ngokuthi yi’Back on Track.’
Esekhethwe ukuba ngumtshutshisi omkhulu weCalifornia ngo2010, uKamala Harris waphoqa amabhanga ukuhlawula imali engangeUS$20 billion, ewajezisa phezu kokuqila abantu ababekwelede imali.
Wathwalisa nzima izigilamkhuba ezichapha imingcele zithengisa izidakamizwa, futhi wagqugquzela ukuthi abantu abalobulili bunye labo bavunyelwe ukutshada.
Ngo2016, uHarris wakhethwa ukuba nguSenator waphanga waba lilizwi elilamandla ekhuluma ndendikimba ezifana leyabantu bokuza, ezempilakahle kanye lokuguqulwa kwemithetho ephatha abantu kabi. Ngoduma lwakhe lokubuza imibuzo enzima uHarris waba ngumuntu obaluleke obaluleke kakhulu elizweni jikelele.
Ngomnyaka ka2020, uHarris wancintisa kukhetho lukaMongameli kodwa kazange ayendawo ngoba kwakulengxabangxoza kulabo ayesebenza labo.
Owake waba ngumphathisi kaHarris uGil Duran uthi, "Yebo sokuke kwaba lemibiko yokuthi kenelisi ukugcina abantu abazi umsebenzi kuhle.”
UBiden wakhethwa ukuthi amele ibandla lakhe wasekhetha uHarris ukuthi abe ngumsekeli wakhe. Ababili laba banqoba kulolukhetho. Lokhu kwaba ngokwakuqala embalini yeMelika ukuthi kube lomsekeli kaMongameli wesifazana kumbe onsundu.
Ebhekane lodaba lokwanda kwabantu abangena eMelika bengelamaphepha emngceleni ongezansi yelizwe, uKamala Harris wakhulumisana lenkokheli yamazwe akhelane leMelika ukuze kulungisiswe ukungahlaliseki okuxotsha abantu kulawomazwe kanye lobuyanga.
Waphanga wafakwa ilihlo ngabezombusazwe.
"Kwakumele kube nguye ovikela umngcele wethu, kodwa angazi ukuthi usekwenzile yini lokho," kutsho osekela uMnu Trump uKathy Willmont.
UHarris usegxilile emsebenzini wakhe awuqhuba echelesile eyisithunywa emhlabeni jikelele lapho asekhulume ngosekelo lweMelika lokuqeda ukufuthelana.
Emsebenzini ochazwa ngokwephula imigoqo kanye lokudlula obekukhangelelwe, uHarris waphinde wavuka, wakhethwa ukuba ngummeli webandla lamaDemocrat ekuphumeni kukaMongameli Joe Biden kulumncintiswano.
Loludaba lulotshwe nguMatt Dibble weVOA News eseOakland, eCalifornia, lwahumutshwa nguNtungamili Nkomo weVOA Studio 7.
Forum