Abasakhulayo abahlala emaphandleni bathi impilo iqhubeka isiba lukhuni ngamandla ngenxa yokusilela kwemisebenzi kanye lokuswela uncedo lokusungula inhlelo zokuziphilisa.
Lanxa bekhona abaqhuba inhlelo ezifana lokufuya inkukhu lokulima, abanye bathi abalalutho lokwenza.
“Impilo inzima emaphandleni bakithi, abasakhulayo bathwele nzima imisebenzi ayitholakali lula,” kutsho osakhulayo ohlala koMadlambudzi, uMnu Thamani Ncube.
UMnu Ncube uke waba ngukhansila walesi sigaba emele ibandla leMDC elikhokhelwa nguMnu Welshman Ncube.
“Mina ngilenhlanhla ngoya ngile barber shop njalo zikhona inhlelo ezithize engizenzayo ukuziphilisa, kodwa abanengi abalalutho lokwenza,” uqhubeke echasisa uNcube.
Esigabeni seKezi, kulabasakhulayo abancediswa kunhlelo zokulima yinhlanganiso yeYouth for Today and Tomorrow, yona esebenzelana leInternational Fountain of Hope.
“Abasakhulayo laba sibancedisa ukulima imbida ukuze bakhone ukuziphilisa,” kutsho uMnu Alert Ncube oweYouth for Today and Tomorrow.
Inhlanganiso le iphathisa abasakhulayo endaweni ezitshiyeneyo zeMatabeleland.
Omunye osakhulayo ophila ngokulima imbida esigabeni seKafusi, eGwanda, okhethe ukwaziwa ngokuthi nguVanessa usole uhulumende esithi akula lutho alwenzayo ukuncedisa ontanga.
“Mina ngiphila ngokulima labazali bami sithengisa imbida, kulapho engithola khona imali yokuthenga isepa lokudla,” kuchasise uVanessa.
Uhlelo lukahulumende olokuphathisa abasakhulayo ngemali yokusungula inhlelo zentuthuko solwamiswa ngenxa yokusilela kwemali.
Lanxa kunjalo, abasakhulayo bemaphandleni bavele bebengayitholi limali. Ibitholwa ngontanga abahlala emadolobheni ikakhulu abasekela iZanu PF.
