Uhlangothi lukahulumende olubona ngokubuthanisa imali yesikhwama selizwe olwe Zimbabwe Revenue Authority (ZIMRA) luthi ilizwe lenelise ukuthola nyakenye imali eyedlula leyo ekade icatshangelwa ngokuyisilinganiso esedlula itshumi ekhulwini.
Umnu. Sternford Moyo umgcinisihlalo we ZIMRA uthi ilizwe lithole phose amabillion amathathu amadola loba nje bekukhangelwe ukuthi kutholakale amabilion adlula amabili kuphela ngomnyaka ophelileyo.
Umthelo we value added tax yiwo obikwa ulethe imali enengi njengoba ulethe okwedlula kancane ibillion lamadola. Bekukhangelelwe ukuthi kutholakale imali phose ibillion lamadola.
Eyinye imali eyedlule leyo ekade icatshangelwa nguhulumende ivele emthelweni wezisebenzi, owe individual tax, customs duty, company tax kanye le excise duty.
UMoyo uthi okwenze kwatholakala imali eyedlula leyo ekade ikhangelelwe lugatsha lwezemali yikuthi izisebenzi zithole iholo elikhuphukileyo nyakenye, amankampani amanye avuliwe njalo sokulendlela eziphezulu esezisetshenziswa nguhulumende ukuthola imali ayifunayo kuzulu, kumankampani lempahleni ethengiswayo.
Uthe okwenza kutholakale imali encane kumankampani yikuthi akulamali yokuvuselela amafekithali.
Umnu. Masimba Kuchera ingcwethi kwezenotho uthi kuyabukeka okwenziwa yi ZIMRA.
